yakari (1).png
Mi hendenan, e holoshi a bay bek un ora y mi ta akinan tur confundi.
E dianan aki 8or di mainta ta bati y ainda solo no a sali. Hopi schandalig, pero ban papia di un tema serio. Temporada di Zwarte Piet ta na porta y prome cu nan zwaai mi afo di Hulanda, mester papia algun berdad. 
 
Pa casi 5 aña caba activistanan na Hulanda incluyendo Quinsy Gario y Sylvana Simons ta bringando pa cambia e celebracion tan stima di Sinterklaas cu Zwarte Piet. E ta tristo pa menciona cu na Aruba, e combersacion aki no a ni cuminsa. Na Aruba, discusionnan tocante rasa di baina ta tuma luga. Nos ta victimanan di nos propio colonisacion y mescos cu Hulanda nos kier pretende cu “racismo”  no ta existi riba nos luga. Pretende cu nos ta hende tolerante cu ta acepta tur cos. Esaki ta leu di ta un realidad, pero bon bayendo bek na e activistanan di Hulanda. Comprende, nan no kier  pa Sinterklaas cu tur su Pietjes nan bay. Locual nan kier elimina ta e echo cu Zwarte Piet ta un caricatura racista. No tin ningun motibo, pakico hende blanco mester pinta nan mes color scur, bisti afro y exagera nan lipnan pa un celebracion. 
 
Na Merca, ora un hende ta pinta su mes manera un hende color scur e ta wordo yama “Black Face”. Y e tin un historia hopi doloroso pa hende color scur, ya cu e tabata wordo uza cu e intencion di burla di nan rasa. E persona den “Black Face” semper a hunga un rol negativo.
Zwarte Piet mes ta un figura cu ta castiga y spanta mucha. Pues, muchanan no tin Zwarte Piet bou di un asociacion positivo.
 
Temporada di Halloween tambe ta saca tur e “creatividad” den hende y  hopi ta of apropia un otro hende su cultura of pinta nan cuero pa pretende cu nan pertenece na un otro rasa ora di scoge nan disfraz. Ignorancia ta algo global y recientemente un periodista Colombiano yama Andreina Solorzano, a haya su mes enfrenta cu hopi critica ora el a post un potret riba instragram caminda e tabata tin su cara y curpa full pinta color scur. Den su perspectiva e tabata “celebrando su amor pa hende color scur”. Pero, esaki no a sinti bon cu e comunidad Afro-Colombiano. Un hende su rasa no por wordo uza como un disfraz pasobra e hende di e rasa ey no tin e luho di bay cas y colga su rasa bek den cashi. Mi ta ripiti un biaha mas.
Un hende su rasa no por wordo uza como un disfraz, pasobra e hende di e rasa ey no tin e luho di bay cas y colga su rasa bek den cashi. Bo no por y no tin derecho di scoge kico ta ofensivo pa un otro rasa di hende. 
 
Hopi hende ta bisa cu activistanan ta zeur, cu e ta un tradicion, cu e ta un fiesta di mucha, cu Zwarte Piet ta color scur pasobra e ta baha di un schoorsteen. Pero esaki no ta cuadra cu e realidad, pasobra baha door di un schoorsteen no ta haci cabey blond fini un afro y e no ta haci bo cuero completamente preto y mucho menos duna bo lip cora diki. Pero aparte di tur e storia ey cu no tin ni pia ni cabes. E realidad di dia ta keda, cu hende color scur ta wordo discrimina den sociedad. Muhenan y hombernan cu afro rond di mundo ta wordo kita for di trabou pa nan cabey cu naturalmente ta crece di nan cabes. Hende color scur a pasa door di e brutalidad di sclavitud, nan curpa nan a wordo cumpra y bendi. Hende blanco a maltrata nan y caba cu casi mita di nan descendencia, pais nan Europeo a horta y ainda ta horta tur cos di Africa.
Paisnan a crea imperionan di ganancia riba e sodo di nan lomba. Nan ta mata hende color scur pa loco y niun hende ta bay cera pa e delito. Nan ta trata cuero color scur manera cu e ta un crimen. Muchanan color scur ta wordo yama “Zwarte Piet” na scol como un insulto. E no ta husto cu hende blanco por djis dicidi di ta color scur pa un dia, bay cas, baña y bay bek na su bida normal. Ta color scur ta “okay” pa un dia y despues bay bek na un bida cu ta liber di acoso. Un bida cu no ta carga cu ne marginalicacion y discriminacion cu ta un hende color scur ta bin cu ne. Nan ta kita e afro y bay bek na nan cabey fini cu ta wordo considera e standard di beyesa. E fiesta ta pa mucha, wel, muchanan ta worry cu Sinterklaas pasobra nan kier regalo y mangel. Djis pasobra un minoria di hende ta contra Zwarte Piet, no kiermen cu nan ta sentimentonan ta invalido. E ta mescos cu duna un bully permiso pa haci y deshaci, pasobra okay e no ta bully tur hende djis un paar so.