Ayera tardi durante un conferencia di prensa di gobierno, Prome Minister, Evelyn Wever-Croes a anuncia oficialmente ken ta e persona cu a wordo nombra como Minister Plenipotenciario nobo y cu lo ta reemplasando Sra. Joselin Croes na Washington, esta Sra. Zulema Dabian-Erasmus.
Prome Minister a elabora ariba e procedura di e nombramento di e Minister Plenipotenciario nobo pa Washington y el a splica cu den e palabracionnan di formacion di gobierno, MEP a palabra hunto cu su partner den coalicion, partido RAIZ, cu MEP ta encarga cu e parti di nombramento di Minister Plenipotenciario na Hulanda y RAIZ di su parti por propone candidato pa Minister Plenipotenciario na Washington.
El a indica cu Minister Ursell Arends, despues di delibera internamente, a bin cu e proposicion pa nombra sra, Zulema Dabian-Erasmus como e Minister Plenipotenciario nobo na Washington.
E mandatario a remarca cu esaki ta prome biaha cu a tuma e decision cu e nombramento no tin cu bira un nombramento politico, pero mas bien nan mester a busca den e aparato gubernamental pa un persona cu ta prepara pa tuma over e trabaonan aki.
Prome Minister a splica cu Sra. Dabian-Erasmus tabata traha na Departamento di Asuntonan Economico y aparte di esey e tabata fungi como docente part-time na Universidad di Aruba.
“Nos ta kere cu Sra. Zulema Dabian-Erasmus ta esun cu por bay representa Aruba den e siguiente cuater añanan aki y mi tin tur confiansa cu Sra. Zulema Dabian-Erasmus ta e persona indica pa yuda nos den esaki,” Prome Minister a indica.
El a informa cu ya caba tur cos ta cla y Sra. Dabian-Erasmus a pasa su screening y proximamente lo ta biahando pa Wahsington, prome cu Sra. Joselin Croes bandona su cargo y dirigi su mes pa Hulanda pa asumi su funcion como directora nobo di Arubahuis, pa e por traspasa tur trabao pa Sra. Dabian-Erasmus.
Prome Minister a enfatisa tambe cu e Minister Plenipotenciario na Washington ta hunga un papel hopi importante pa asisti Gobierno di Aruba, y pueblo di Aruba en general, den logra nan metanan.
