CEO di Facebook, Mark Zuckerberg ayera a splica con lansamento di un cryptomoneda nobo yama Libra por yuda e red social genera mas ingreso di aviso.
Durante e reunion anual di accionista ayera, Zuckerberg a contesta con Facebook lo gana placa cu Libra, cual no a lansa ainda. Introduccion di un cryptomoneda nobo y otro herment manera tienda online lo haci comercio mas efectivo pa negoshi y lo resulta den prijs mas halto pa aviso, cu ta beneficia Facebook financieramente, Zuckerberg a bisa.
Esey pasobra Facebook no ta bende aviso na un prijs dicidi. Sino cu negoshinan ta haci oferta pa prijs di un aviso basa riba e resultadonan cu ta purbando di logra, el a bisa. Facebook ta permiti negoshi enfoca aviso basa riba edad, ubicacion, interes y otro caracteristica. Zuckerberg a bisa cu si tin un forma di pago registra ta bira mas facil pa clientenan cumpra algo, pues tin mas balor pa e negoshinan paga mas pa un aviso.
Comentarionan di Zuckerberg ta duna detaye tocante strategia di e compania pa lansamento di caracteristica nobo di pago y comercio digital. Facebook y su socionan a promove Libra como un forma di yuda hende cu no tin acceso na servicio financiero of mester paga hopi pa manda placa den exterior. Pero ta cla cu e red social ta pensa cu por beneficia di Libra tambe, hasta na momento cu ta enfrenta scrutinio regulado di legisladornan.
Tabata spera cu Libra lo lansa den prome mita di 2020, pero status di e proyecto no ta cla na e punto aki. Libra Association no a responde inmediatamente na pregunta riba e lansamento.
