Pa di tres siman consecutivo, tabata exitoso: E biaha aki no cu un, sino dos captura di droga.
Diasabra ultimo, e barco di marina Hulandes a intercepta dos go-fast den menos di tres ora cerca di islanan ABC. Den total, a detene siete sospechoso y a confisca aproximadamente 1790 kilo di cocaina.
Diasabra marduga, un avion patruya Dash-8 di Wardacosta di Region Caribe a descubri un go-fast sospechoso den lama di Caribe. Zr. Ms. Holland a actua inmediatamente mandando su barconan di intercepcion lihe. Mirando e FRISC, e cuatro contrabandista a tira e pakinan di droga den lama, a stop nan barco y finalmente a entrega. Den total, e cuatro persona tabata contrabandiando aproximadamente 1290 kilo di cocaina. Abordo tabatin tres homber Venezolano y un homber Colombiano.
Tiki despues cu e sospechosonan y e droga a keda hiba abordo di Zr. Ms. Holland, e barco a detecta, danki na su sistemanan di radar, otro go-fast. E biaha aki, e tres contrabandista no a rindi asina facil. Nan tambe a tira droga den lama. E lancha no a stop te cu a tira riba e motornan. Den e segundo confiscamento, tripulacion di Zr. Ms. Holland a recupera aproximadamente 500 kilo di cocaina for di lama. Abordo di e go-fast tabatin tres homber Venezolano.
E sospechoso y droga di e prome accion a keda entrega na Corsou na Cuerpo di Polis di Corsou. E droga y sospechoso di e di dos accion a keda entrega na Bonaire, na Cuerpo di Polis di Caribe Hulandes. E substancianan confisca ya a keda destrui.
Zr. Ms. Holland ta e barco staciona den Caribe. E barco di Marina ta traha den operacionnan anti-droga den colaboracion alterno cu Wardacosta di Merca y Wardacosta di Caribe. E dos casonan aki a tuma lugar bao direccion di Wardacosta di Caribe.
