E barco di stacion Zr.Ms. Holland a cuminsa riba dialuna 2 di september cu su patruyahe riba lama Caribe. Cuater dia despues, diabierna 6 di september den oranan di mainta, tabata directamente bingo.
E barco e mainta ey a ricibi un notificacion cu e avion di patruyahe Dash 8 di Wardacosta Region Caribe a localisa un go-fast sospechoso den bisindario di islanan ABC. Despues di esaki Zr.Ms Holland a drenta den accion y a lansa su botonan di intercepcionan rapido, e asina yama FRISCnan, cu riba cual tabatin ekiponan combina di tripulacion di barco, Wardacosta Mericano y e Escuadron di Flota di Marina.
Tambe e helicopter abordo, e NH90, a duna sosten desde laira durante e operacion anti droga. E sospechosonan riba e boto di droga mas cu un biaha a neglisha e orden pa para. E go-fast a stop numa despues cu a tira dirigi riba e motornan di e boto
Cocaina y marihuana
Abordo di e boto di contrabanda tabatin 9 pasahero, un total di 52 pakete a keda confisca. Den esakinan tabatin 210 kilo di cocaina y 2110 kilo di marihuana. E sospechosonan di e droganan a keda entrega na Wardacosta Mericano. Un sospechoso tabata herida y pa e motibo ey a keda traslada pa Corsou den e helicopter NH90, pa ricibi trato medico.
Barco di stacion
E barco di stacion Zr.Ms. Holland entre otro ta keda desplega pa operacionnan anti-droga. Pa esey e tripulacion ta traha intercambiando hunto cu Wardacosta Mericano y Wardacosta di Region Caribe Hulandes.
