Compania di app di video Zoom a bisa ayera cu ta lamenta cu algun reunion involucrando disidentenan Chines basa na Merca a ser interumpi, mientras un activista prominente di Hong Kong a bisa cu a blokea su cuenta a pesar cu e ciudad ta garantisa libertad di expresion.
Zoom tin sede na San Jose, California, pero ta conduci hopi di su investigacion y desaroyo na China continental. Uso di e app di reunion virtual a aumenta dramaticamente durante pandemia.
E compania a confirma reporte cu a reactiva cuentanan di Zoom di un grupo di disidente basa na Merca cu a ser suspendi despues cu nan a tene un evento online conmemorando e accion riba manifestante na Tiananmen Square na Beijing dia 4 di juni 1989.
“Nos ta lamenta cu algun reunion reciente cu participante tanto paden como pafo di China a ser impacta negativamente y combersacionnan importante a keda interumpi”, Zoom a bisa den un declaracion.
Contestando na un sesion di informacion regular, vocero di Ministerio di Exterior Chines a bisa cu e no tabata na altura di problema involucrando Zoom.
China ta prohibi disidencia publico. Agregando na preocupacion aumentando cu e alcance di su censura ta extendiendo mas ainda den Hong Kong semi-autonomo, activista pro-democracia Lee Cheuk-Yan a bisa cu el a keda suspendi di su cuenta paga di Zoom dia 22 di mei prome cu el a tene un charla via video en bibo cu activista Jimmy Sham.
Lee, kende ta yuda organisa e conmemoracion anual di e accion di 1989 na Hong Kong, a bisa cu dos charla anterior cu tambe tabata parti di e serie di evento online ‘June 4’ a tuma luga sin incidente. Gobernadornan comunista di China a priminti di permiti e ex-colonia Britanico di 7 miyon persona libertadnan civil y otro libertad pa sikiera mey siglo despues cu Beijing a tuma control na 1997.
Algun compania di red social, manera Twitter y Facebook, ta mas tanto blokea paden di China. Zoom no. Pero ta entre cantidad di compania suheto na scrutinio cercano di Beijing, mientras nan ta opera a traves di frontera global. Problemanan relaciona na siguridad cibernetico y censura ta particularmente fuerte pa esunnan cu ta pasa of warda data den continente Chines.
Un screenshot di pagina di Facebook di Lee, post dia 27 di mei, ta mustra un mensahe di eror riba Zoom, bisando cu a desactiva su cuenta y cu e mester tuma contacto cu servicio di cliente pa asistencia. Lee a bisa cu el a purba, pero no a haya un contesta ni reembolso pa e servicio pa cual el a paga.
“Si bo blokea mi pa motibo di mi actividad politico, bisa mi”, Lee a bisa den un entrevista. “Ta indignante cu Zoom no a duna mi un respuesta. Un compania Mericano ta bay sigui ley Chines, na luga di libertad di expresion y informacion na Merca?” el a declara.
Zoom a bisa den su declaracion cu mester cumpli cu ley den e pais unda e ta opera y cu ‘no ta den poder di Zoom pa cambia ley di gobierno opuesto na libertad di expresion’.
“Nos ta lucha pa limita accion tuma na esunnan necesario pa cumpli cu ley local”, e declaracion a bisa.
Zoom a bisa cu ta trahando pa protege usuarionan di autoridadnan ‘cu kier sofoca nan comunicacion’ y protege combersacion di participantenan mas leu cu frontera di e regionnan aki.
E compania a nenga di duna comentario ora a puntra ki ley e tabata cumpli door di blokea activistanan di usa nan cuenta.
