“E proyecto aki (Zoetry) no ta un cu no tin discusion na nivel amplio. Pero esey no kiermen cu gobierno tin un prehuicio den e direccion cu e ta bay pasobra mescos cu tin hendenan cu ta defende y sostene y proteha e medio ambiente den e area, mescos bo tin hopi otro cu ta bisa cu si e ta bon pa e bario y pa diversifica turismo. Ey ta caminda cu e evaluacion dificil cu mester wordo haci lo wordo haci, na momento cu tur e informacion ta aden.”

Minister di infrastructura y medio ambiente Otmar Oduber (POR) despues di varios pregunta di prensa a atende cu e topico di proyecto Zoetry cu lo kier establece su mes den area di Isla di Oro pa traha un asina yama ‘eco hotel’. Despues cu varios organisacion ambiental entre otro Aruban Warriors, Aruba Birdlife Conservation y Accion Ambiental a tene un manifestacion luna pasa, minister di turismo a expresa na Bon Dia Aruba cu lo bin cu e desaroyo aki solamente si bin cu un estudio independiente riba e materia.

Sr. Oduber dunando un informe riba e situacion actual a menciona un bes mas cu no a haya un traspaso debido, pa locual no por a haya documentacion riba e proyecto aki, te hasta ni na DIP. E proyecto aki lo mester a conta cu conseho di diferente departamento, entre otro Departamento di Naturalesa y Medio Ambiente (DNM). Minister a indica cu actualmente ta wardando riba e conseho aki desde april ultimo.

Sinembargo, ora haya e conseho aki lo mester haci un midimento apart segun e minister, riba areanan proteha. “Of areanan cu lo mester haya proteccion, pasobra laga nos ta cla, te na e momentonan aki no tin area proteha ainda conforme of a base di e 16 areanan di marine park. Nos sa cu ROP ta proteha e area aki tambe ten a cierto grado.”

Aunke e areanan aki no ta proteha oficialmente te awo, e minister a indica cu lo por bay anticipa riba esaki, particularmente pa loke ta trata otorga cualkier tipo di permiso den un tal area. “Bo no ta bay djis saca permisonan sin cu tin presencia di areanan protegi sabiendo cu bo lo bay proteha nan den futuro. Kiermen esey tambe nos lo tuma den consideracion na momento cu mester dicidi si otorga un permiso si of no na e desaroyadonan di Zoetry.”

Documentonan entrega na partido Raiz
Siman pasa a entrega cierto documentonan na partido Raiz relaciona cu e desaroyo di e proyecto di Isla di Oro, manera Bon Dia tambe a trece dilanti. E partido a entrega un peticion a base di ley di transparencia di gobernacion (Landsverordening Openbaarheid van Bestuur). Riba esaki minister a comenta cu semper y cuando un persona tin un rason pa pidi un documento di gobierno, nan por duna esaki. “Si na cierto momento tur documento cu drenta gobierno bira habri pa tur hende e ora ey ta bira un discusion basta complica riba cada proyecto cu mester drenta.” Minister no a mira ningun motibo pa no duna e informacion aki, cual nan a entrega completamente na e partido, mirando cu medio ambiente ta den e statutonan di e partido y mirando cu e proyecto tin preocupacion den comunidad pe.

“E proyecto aki no ta un cu no tin discusion na nivel amplio. Pero esey no kiermen cu gobierno tin un prehuicio den e direccion cu e ta bay pasobra mescos cu tin hendenan cu ta defende y sostene y proteha e medio ambiente den e area, mescos bo tin hopi otro cu ta bisa cu si e ta bon pa e bario y pa diversifica turismo. Ey ta caminda cu e evaluacion dificil cu mester wordo haci lo wordo haci, na momento cu tur e informacion ta aden.”