E medida di ordo cu tabatin na luna di december tabata dirigi riba Zissu, pa e no haci ningun funcion comercial. Na e momento ey hues no a duna ordo na gobierno ainda pasobra a bay for di e punto di bista, cu gobierno lo warda pa tuma accion. Sinembargo esaki no a tuma luga. Notario Tromp tampoco a actua corecto pues ta expone su mes pa no a haci trabou debido den e caso aki, segun abogado di Preserva Malmok Lincoln ‘Dello’ Gomez
Segun e abogado a splica, unabes tin un medida di ordo poni pa Zissu gobierno lo mester a warda te ora cu tin un veredicto pa tuma accion den e caso aki. Cual ta e manera cu ta anda normal den e situacionnan aki, conforme reglanan cu Pais Aruba ta atene su mes na dje. Haciendo esaki (autorisacion cambio den permiso) gobierno a expone su mes na e suma obligatorio.
Sr. Gomez a splica cu a informa gobierno di e caso pendiente, pero nan no a respeta esaki kedando sin tuma accion pa loke ta e erfpacht lamentablemente. “Mi ta haya di lamenta pasobra, e exposure lo tabata cero si gobierno a warda un siman mas pa pasa e acta. Den e caso aki e notario Tromp kende a coopera pa pasa e acta sin warda claridad riba e aspecto di erfpacht tambe ta expone su mes pa demanda di Preserva Malmok, Zissu y gobierno.” Segun Sr. Gomez pasobra tur tres tin motibo pa tene e notario responsabel.
A puntra Sr. Gomez si ya gobierno y Zissu a bay haci e cambio bek di e permiso el a bisa cu tanten cu e erfpacht no wordo cambia bek pa erfpacht e ta exponi pa e suma obligatorio di 25 mil florin cada dia te na maximo di 10 miyon florin. “Pues ta keda na interes di tur partido pa e wordo cambia bek.
Mirando cu e compania Zissu a haci promocion amplio pa e hotel online etc. a puntra Sr. Gomez si nan tabatin “booking” of si a constata cu nan a viola e medida di ordo cu tin contra di nan. El a bisa cu lamentablemente cosnan a tuma luga cu ta indica cu no a cumpli cu e medida di ordo. Haciendo calculacion, a constata esaki pa un periodo di algun dia cu ta yega na e suma 300 mil. “Na december a discuti riba esaki y aworaki cu Preserva Malmok tin derecho pa ehecuta e sentencia, e ta un proceso legal cu ta bay cana. Pa loke ta e caso sumario di awo, si Zissu no ta contento nan por apela esaki.” A puntra Sr. Gomez ki tempo ta spera un veredicto den e caso aki, el a bisa cu si nan apela e por dura un aña pa un aña y mey. Si e bay “bodem procedure” tambe. Si bay Corte Superior e por dura mas o menos 3 aña prome cu decision final. “Nos tin prueba cu hende a haci reservacion cual ta duna di conoce cu no a respeta.
Terminando el bisa cu corte a constata cu den diferente ocasion Ocean Z a actua den un forma inapropia pero tambe den un forma ilegal. “Ocean Z a mal representa y gaña ora cu a entrega un peticion pa permiso di construccion bisando cu e ta pa cas, mientras cu Zissu Properties di dia cu nan a forma e compania, tabata pa opera hotel pues nan a gaña DOW ora di entrega e peticion di permiso aki.” Sr. Gomez a termina bisando.
Abogado Croes cu ta representa Zissu a desea pa no duna informacion, pendiente su cliente cu kier yama un conferencia di prensa posiblemente awe pa mustra su papelnan di permiso y trece su banda dilanti.
.JPG "Situacion na Malmok preserva por lo pronto")
