E virus Zika cu e mesun sangura di Dengue y Chikungunya, esta Aedes aegypti, ta transmitiendo no a drenta Aruba ainda. Pero pa motibo cu e virus si ta activo den region, GKMB a manda un EPI alert. Esaki ta nifica cu sector medico mester ta alerta riba sintoma y tambe pa pueblo ta consciente y tuma medida di prevencion. “
Por afecta celebro baby
E importante di e virus Zika ta cu e sintomanan ta leve, menos cu e virusnan di Dengue y Chikungunya y e complicacionnan ta masha poco mes. Sinembargo den e aña aki ta nota un aumento substancial di mal formacion celebral na Brazil. E virus Zika por afecta e baby su celebro na momento cu e ta den barica di e mama y esaki wordo infecta dor di e virus. Loke ta wordo yama “microcefalia” esta cu e celebro di e baby ta mas chikito cu normal treciendo cune deficiencia neurologico y mental”, GKMB ta informa.
Na 2014 e sangura Aedes aegypti ta plama e virus Zika, cu ta bin for di Africa y despues na Polinesa Frances y despues a emigra na cierto paisnan Latino America manera Brazil, Paraguay, Mexico, Salvador, Nicaragua, Colombia, Surnam y Venezuela.E situacion na Brazil a causa basta panico y e autoridadnan autorisa a laga conduci un investigacion. E virus Zika ora e infecta un mama cu ta recien na estado por causa dañonan na e feto y na e sistema nervioso y e celebro di e mucha, segun GKMB.
“Aunke Aruba no tin ainda e Zika virus toch ta bon pa alerta. Eliminando criadero, ta preveni entrada y reproduccion di sangura cu ta carga y transmiti otro virus muy en special durante e temporada di yobida. E alerta epidemiologico di PAHO/WHO ta na vigor. Ta di vital importancia pa esunnan cu ta bay biaha pa tuma tur medida necesario ora nan ta biaha pa pais of regionnan ariba menciona.”
