(AFP)—Presidente Ucraniano Volodymyr Zelenskyy a acepta diamars e acuerdonan media pa Merca pa Ucrania y Rusia parando nan ofensiva den e Lama Preto y riba infrastructura di energia, pero a critica Washington pa acorda na relaha restriccionnan riba exportacionnan Ruso.
Un declaracion di e Cas Blanco riba e asunto no ta declara claramente ki ora un paro asina lo bin den efecto, of cual restriccion lo ser relaha, y declaracionnan trempan for di Kyiv y Moscu a mustra desacuerdonan.
Negociadornan Mericano a logra yega na un acuerdo despues di tres dia den reunion den e capital Saudi di Riyadh cu delegacionnan for di Ucrania y Rusia. “Esakinan tabata e reunionnan corecto, e decisionnan corecto, e stapnan corecto. Ningun hende por acusa Ucrania di no move pa paz sostenible despues di esaki,”Zelenskyy a bisa durante un conferencia di prensa di Kyiv.
El a adverti sinembargo cu ta “demasiado trempan pa bisa si e lo traha.” Ucrania a asumi cu e alto-el-fuego parcial lo bin den efecto e momento cu Washington a publica e acuerdonan, Zelenskyy a bisa, pero Rusia a bisa cu Merca mester relaha sancionnan prome afectando exportacionnan di agricultura.
Merca nunca a sanciona Rusia directamente pero si a limita acceso na sistemanan di pago usa pa transaccion internacional. Zelenskyy a critica Washington su decision pa yuda restaura e acceso di Rusia na e mercado global pa su productonan agricultural, bisando cu e tabata “debilitando” e posicionnan di aliadonan.
El a priminti cu Ucrania lo “haci nos trabao pa implementa e acuerdonan,” aunke mester traha riba algun detaye ainda. E minister di Defensa Ucraniano, Rustem Umerov, ken a tuma parti den e discusionnan na Riyadh cu Merca, a bisa riba red social: “Ta importante pa tene mas consulta tecnico mas pronto posible pa acorda riba tur detaye y aspectonan tecnico di e implementacion, monitoreo y control di e areglonan.”
Pero si barconan di guera Ruso move for di e parti este di e Lama Preto, Umerov a bisa, e ora “Ucrania lo tin derecho completo pa eherce autodefensa.”
Oficialnan Ucraniano y Mericano a acorda cu tercer partidonan manera Turkia por observa e aspectonan di un tregua den futuro entre Rusia y Ucrania, Zelenskyy a bisa.
Tambe riba mesa pa discuti tabata un acuerdo planea tocante extraccion strategico di mineralnan importante den Ucrania cu Merca. Tabata planea pa firma e acuerdo aki na Washington luna pasa pero un pleito televisa entre Zelenskyy y Trump a tuma luga.
Washington a presenta un acuerdo nobo, Zelenskyy a bisa, agregando cu e tabata un “acuerdo grandi y completo” pero e no a mira e detayenan ainda. Ucrania tabatin speransa pa haya garantia di seguridad den intercambio pa acceso na recursonan mineral, pero versionnan preliminar no a inclui suficiente proteccion, y Washington a rechasa pa manda cualkier forsa di mantene paz pa Ucrania.
Zelenksyy a bisa cu e tabata anticipando pa haya claridad for di un cumbre binidero na Paris den cual paisnan lo contribui forsanan pa observa posible acuerdonan di paz por medio di manda mantenedornan di paz pa su pais.
