Diabierna ultimo durante un conferencia di prensa Paseo Herencia a anuncia e studiante atleta cu e keda selecciona pa ricibi ayudo a traves di nan programa mas nobo di sponsorship cual ta Gift of Education & Sports. Zair Croes, di 19 aña di edad atleta di triatlon, a keda eligi como e prome studiante atleta cu lo ricibi ayudo a traves di e programa nobo aki.

Durante e conferencia Zair a conta cu e tin cinco aña caba practicando e deporte aki y a competi riba nivel local y a representa Aruba riba nivel internacional tambe.

El a conta cu el a scoge Emmanuel University (EU) na Georgia, Atlanta, door di un amigo cu tambe ta practica triatlon cu tambe ta bay e mesun scol. Zair a haya un beca parcial pa drenta den e ekipo di landamento y e ekipo di triatlon.

El a sigui conta cu door cu gastonan ta halto pa studia na Merca el a dicidi di aplica pa e Gift of Education & Sports USA edition y el a remarca cu e ta hopi contento y agradecido cu el a keda selecciona.

“Mi mester gradici tur mi sponsor y coachnan y mas importante mi mayornan pa sostenemi den mi deporte. Mi ta gradici tambe Paseo Herencia pa duna mi e oportunidad aki y pa duna mi chens pa wordo selecta pa haya placa pa mi bay afo,” el a bisa.

Prome cu el a drenta den e deporte di triatlon Zair tabata practica algun otro deporte. El a conta cu el a cuminsa practica futbol prome ora e tabata chikito y e tabata hunga pa ekipo di Britania.

El a sigui conta cu despues el a stop di hunga futbol y a cuminsa practica tennis y windsurfing. El a indica cu e tabata haci mas tanto tennis y aki aya e tabata haci windsurfing.

Despues el a dicidi pa cuminsa core pa yudele cu su condicion fisico pa tennis, pero den esey el a ripara cu e tabata gusta coremento mas cu hunga tennis y cu e tabata hopi bon den coremento.

Eynan el a dicidi di stop full cu tennis y el a cuminsa enfoca full ariba e deporte di coremento. Despues poco poco el a drenta ciclismo y landamento y for di eynan e amor pa e deporte triatlon a sigui crece.

Zair tabata den preparacion pa e competencia Carifta na Barbados, pa cual el a remarca e tabata train basta duro, mas o menos 20 ora pa siman. Algun dia e tabata train tres ora pa dia y algun dia cuater ora pa dia. “Por ehempel mainta nos ta train ciclismo, atardi ta coremento y anochi ta train landamento na pool na Savaneta,” el a bisa.

Alimentacion ta un parti hopi importante. Zair a splica cu su mayornan, specialmente su mama, ta esun cu yud’e cu su alimentacion. El a conta cu su mama ta lanta mainta trempan pa cushina tur su cumindanan, prepara nan den bakinan di glas y warda nan den frigidaire. Ora cu e caba di train mainta e ta yega cas, keinta su cuminda y come di biaha.

El a agrega cu pa anochi tambe su mama ta prepara su cuminda pe door cu su trainingnan ta caba hopi laat. “Mi ta yega cas e ora come di biaha y ta mas facil.”

Diadomingo Zair a biaha pa Antigua prome y despues pa Barbados pa competi den e competencia Carifta. Despues di Barbados e ta biaha pa Atlanta, Georgia pa cuminsa e etapa nobo di su bida como studiante atleta.

Tocante su sentimentonan, Zair a remarca cu e ta un sentimento 50/50. “Mas cu claro bay studia afo no ta facil, bo tin e 50/50 cu bo ta emociona pa bay, pero tambe bo tin miedo pasobra bo no sa kico ta bay pasa. Pero mi conoce algun hende caba na e scol unda mi ta bay cuminsa studia cu ta mustra bon hende y cu lo yuda mi pa fit den e ekipo,” el a expresa.

Paseo Herencia tin varios aña caba ta yudando studiante y deportistanan. Nan c cuminsa inicialmente cu e proyecto di Gift of Education nuebe aña pasa pa yuda hobennan cu nan gastonan di nan estudio.

Aña pasa nan a anuncia cu ta cuminsa cu e programa pa yuda atletanan cu e gastonan den nan deporte, specialmente pa competencianan internacional y e aña aki a expande e programa mas ainda pa yuda tambe e studiante atleta cu tin ambicion di bay afo y combina nan estudio cu nan deporte.

E proceso di admision pa e programa Gift of Education & Sports USA edition a rekeri cu candidato tin cu entrega un carta di motivacion, un CV completo deportivo y academico, y nan carta di admision pa e universidad. Comision a evalua tur aplicacion riba e logronan den tanto educacion como deporte, cu un rekisito cu nan mester ta parti di e team deportivo di nan universidad.

Di e tur e aplicacionnan cu nan a ricibi esun di Zair a cumpli cu tur e rekisitonan y a resalta pa su logronan den su educacion y deporte.