ORANJESTAD – Corte den prome instancia ayera a entrega sentencia den e caso di asesinato di e conocido Hubert Ski Arridnel, cual a tuma luga dia 18 di augustus di aña pasa.
Den algun ponencia, hues no a comparti opinion di fiscal, y tambe a rechasa algun ponencia di Ministerio Publico, segun informacion di Mas Noticia y 24ora.com.
Pa locual ta trata asesinato premedita, hues a dicta cu Ministerio Publico no por a proba cu esaki tabata e caso. Ya cu prome cu e suceso, e grupo a pasa club y a consumi alcohol y droga. Locual si por a proba, tabata tiramento y posesion di un arma di candela ilegal.
Den e caso contra Zachary Quandt, kende a los tiro, fiscal a pidi 18 aña. Hues a dicta na prome luga cu no por trat’e den corte hubenil. Sinembargo, teniendo cuenta cu e ta su prome ofensa, hues a duna sentencia di 10 aña di prizon, restando e tempo cu el a pasa cera caba.
Pa e otro sospechosonan, tambe hues a duna un sentencia mas abou di locual fiscal a pidi. Den e caso Jorcy Werleman, fiscal a pidi 18 aña di prizon, pero hues no a haya e ponencia di Ministerio Publico convincente, y a dicidi di declara e acusado liber.
Pa Joseph Boekhoudt, kende tempo di e suceso tabatin 15 aña di edad, hues a duna cuater aña den detencion hubenil, manera fiscal a pidi, pero cu un aña condicional bou guia psicologico. Sypress Kock, kende tambe tabata menor di edad tempo di e suceso, hues a duna un sentencia di dos aña den detencion hubenil.
E caso di Thomas Werleman, kende tabata chauffeur di e auto dia di e suceso, no a wordo trata ainda. Fiscal a pidi un aña di prizon.
