Ayera 18 di november, Centro pa Hoben y Famia a duna inicio oficialmente na e siman di Lantamento di Mucha en conexion cu e Dia Internacional di Derechonan di Mucha.

Minister di Husticia y Asuntonan Social, Sr. Rocco Tjon tambe tabata presente y hunto cu Sra. Yvonne Geerman Bermudes, directora di Centro pa Hoben y Famia y Srta. Jeamiree van der Werf, trahado preventivo na Fundacion Respetami, a elabora mas ariba e siman di lantamento di mucha y actividadnan cu lo tin pa celebra e muchanan.

E aña aki Centro pa Hoben y Famia ta celebra un aña di existencia. Sra. Geerman Bermudes a indica cu e meta di Centro pa Hoben y Famia ta pa brinda informacion, guia y sosten na henter e comunidad di Aruba ariba e tema di lantamento di mucha bao di un solo dak.

Na 2018 e siman di lantamento di mucha a keda introduci oficialmente. Cu e inicio di e siman di lantamento di mucha, comision Vision Pedagogico, un comision cu ta consisti di cinco diferente organisacion, Departamento di Asunto Social, Tienda di Educacion, Fundacion pa Nos Muchanan, Fundacion Respetami y Stichting Wit Gele Kruis, ta pone extra atencion na e tarea importante cu henter comunidad tin pa cu lantamento di mucha.

En conexion cu e tema di lantamento di mucha, e comision di Vision Pedagogico, hunto cu Fundacion ADRA y FADA, ta pone enfasis ariba e seis puntonan basico importante pa lantamento di mucha:

  • Ban lanta nos yiunan cu amor y respet y den un ambiente sigur;
  • Ban duna nos yiunan compliment;
  • Tin expectativanan realistico pa cu nos yiunan;
  • Ban lanta nos yiunan cu disciplina positivo;
  • Cuida nos mes como mayor pa asina nos por cuida nos yiunan;
  • Mayornan no lubida cu por busca sosten pasobra tin ayudo.

“Pa medio di e seis punto basico aki nos kier conscientisa nos comunidad en general ariba e importancia di pone nos muchanan central, di e importancia di e derecho di nos muchanan. Esaki ta e motibo cu nos a combina tambe e siman di lantamento di mucha cu e dia internacional di derechonan di mucha. Nos kier pone enfasis ariba e papel importante cu mayornan y educadornan y henter e comunidad tin den e lantamento di e muchanan na Aruba”, Sra. Geerman Berrmudes a indica.

Minister Rocco Tjon tambe tabata presente durante e rueda di prensa pa e inicio di e siman di lantamento di mucha cu ta enfoca ariba e lantamento y proteccion di e muchanan. Tjon a conta cu 32 aña pasa lidernan mundial a tuma e decision na e Asamblea General di Nacionnan Uni pa proteha bienestar di tur mucha pa medio di un tratado y na aña 2001 Aruba tambe a firma e tratado aki y na mesun momento a instala un comision pa percura cu e tratado aki ta wordo ehecuta di e manera corecto.

“E comision aki ta consisti di 8 organisacion gubernamental y dos organisacion no gubernamental. E no a keda te ‘kinan, tambe a instala un task force pa derecho di mucha na aña 2014, un task force cu ta traha den reino y ta netamente ariba 20 di november di aña 2018 tin un MOU a wordo firma pa asina sigui fortifica e partinan aki y pa enfatisa tambe e importancia cu derechonan di mucha mester tin”, el a bisa.

Tjon a enfatisa cu e celebracionnan aki no ta solamente pa e muchanan gosa y disfruta di nan dianan special, pero e celebracionnan aki tambe ta pa crea conscientisacion ariba kico e derechonan di mucha ta, cual no ta solamente pa e muchanan pero tambe pa e mayornan, pa nan por tin e hermentnan necesario pa proteha, respeta y lanta nan yiunan.

“Di parti di gobierno nos lo haci tur cos posibel pa mas y mas brinda e recursonan necesario na e instancianan cu ta haciendo e trabounan aki y tambe obviamente a traves di maneho, a traves di cambionan di ley tambe lo sigui haci nos esfuerso pa sigui brinda proteccion na nos muchanan”, el a agrega.

Jeamiree van der Werf, trahado preventivo di Fundacion Respetami a elabora ariba e kalender di actividad cu tin pa asina tanto e muchanan como e mayornan por disfruta di e dianan dedica specialmente na e muchanan.

Lo tin diferente actividad, entre na Centro di Bario Playa Pabou, Walk and Run pa e muchanan, lo tin entrevistanan cu profesionalnan ariba e tema di salud mental di muchanan y e derechonan di mucha. Lo tin tambe un marcha, organisa pa gobierno di Aruba pa celebra e Dia Internacional di Derechonan di Mucha y hopi mas actividad. Pa mas informacion ariba tur e actividadnan cu lo tin por bishita e Facebook page di Centro pa Hoben y Famia.

“Nos ta invita henter comunidad di Aruba pa para keto no solamente dia 20 di november como dia internacional di derecho di mucha, pero tur dia di aña, nos muchanan tin derecho, nos tur como ser humano tin derecho y nos tin cu respeta esaki tambe den nos muchanan y asina nos ta manda un mensahe na e muchanan cu nan tambe ta importante y nan tambe ta stima”, Srta. van der Werf a bisa.