Yvette Geerman Salubridad Publico: ”Ta dificil pa conclui kico ta tras di e holonan straño cu tin na cierto supermercado Chines”

Den un entrevista cu Yvette Geerman di Departamento Di Salubridad Publico, e la splica Bon Dia cu ta hopi dificil pa bin na un conclusion concreto na kico por ta  causando e holonan straño cu cierto supermercado Chines ta produci.

 ”Actualmente nos no ta hayando mesun hopi keho tocante esaki den comparacion cu 2 of 3 aña atras.

Nos a haci investigacion pa purba di trece solucion pa e comerciantenan y consumidornan, pero ta hopi dificil pa saca un conclusion concreto na kico por ta causando esaki” , Sra. Geerman a splica Bon Dia.

 Segun Sra. Geerman, un di e cosnan cu nan a investiga ta e tipo di plastico cu ta wordo uza y esaki ta wordo cumpra door di e mesun distribuidor aki na Aruba mes.E marca di plastico ‘Darnel’ ta esun di mas uza aworaki cu un calidad mas halto y e ta wordo distribui door di e compania Carex. Salubridad Publico a bishita e tereno pa asina mira con ta para cu e deposito, por ehempel si e plastico aki ta para banda di habon  of otro tipo di kimico prome cu e yega e supermercadonan.

 Segun Sra. Geerman nan ta warda e plastico den un bon luga, e no ta produci ningun holo straño y no tin nada otro warda banda di dje cu lo por causa cu e plastico ta trece cun’e un mal holo despues di yega e supermercadonan.

 Tambe a agrega cu den e control anual cu Salubridad Publico ta haci, a topa cu e uzo di e veneno ”Moth Balls” contra cacalaca y raton na varios supermercado Chines. E veneno aki sa di produci un holo hopi sterki, pero no tin indicacion cu esaki por ta e motibo tras di e holonan cu ta hasta penetra den cuminda manera pan, beleg y hopi mas. Locual a investiga tambe ta e uzo frecuente di cierto veneno y pesticida. Tin indicacion segun e control di Salubridad Publico cu esaki no por ta e origen door cu e veneno y pesticida no ta wordo uza frecuentemente tampoco.

 ”Algun conseho cu nos ta duna e comerciantenan ta pa nan zorg cu no tin productonan manera habon of otro kimico cerca di cuminda. Nos ta guia y dirigi nan pa tene na cuenta cu esaki.” ,  Segun Sra. Yvette Geerman.

 E motibo tras di e holonan aki ainda desconoci
 Gerente di Cheng’s Supermarket na Bubali a conta Bon Dia cu e ta haci su sistema di ventilacion limpi 2 biaha pa aña. Tambe e ta zorg pa sortia su productonan apropiadamente. E la agrega cu e causa di e holo straño por ta cu ora di cera e luga, si bo no laga e ventilacion cendi pa e productonan friu ,manera e freezernan di beleg, esaki  por trece problema.

 A papia cu gerente di Jou Hui Foodmart na Sabana Basora, y e meneer aki a conta Bon Dia cu nan tin hopi na cuenta con nan ta sortia nan producto door cu nan ta un luga chikito. E la sigui agrega cu tin un diferencia entre e generacion nobo di Chines na Aruba cu ta practicamente un poco mas consciente di cosnan asina ki.

  ”Nos ta uza Baking Soda pa mop e piso, door cu esaki ta absorba cualkier holo malo cu por tin, y tambe nos ta zorg pa benta afo tur clase di berdura putri prome cu e cuminsa causa un mal holo” , Gerente di Jou Hui Foodmart a conta Bon Dia.

 Preocupacion di consumidornan
 Bon Dia a entrevista Lex Van Vugt, despues di un post riba su pagina di Facebook cu yama ‘Lex A Taha’, caminda el a saca un video unda e ta puntra e comunidad si algun hende por sa kico por ta causando e holonan straño na varios Chines rond di Aruba.

 ”Bo por kere cu mi a bay te Panama, drenta un supermercado Chines y mi a topa cu e mesun holo eynan tambe!” Lex ta conta Bon Dia.

 Segun Sra.Yvette Geerman, pa e Departamento di Salubridad Publico,  ta importante pa pasa cerca nan y registra bo keho pa nan por haci algo y yuda bin na solucion. 

 Sra. Yvette Geerman ta splica: ”Ami lo aprecia si comunidad lo keda duna keho cerca nos. Pa mi esaki lo ta relevante pa mi tin mas dato. Si comunidad no ta duna keho y bin comparti nan preocupacion cu nos e ta bira dificil pa tin dato y cifra pa sa ki direccion nos por bay . Den e manera aki nos lo sa kico nos por haci manera Salubridad Publico pa produci un solucion”.