Youmika Pierre ta un hoben di mi 18 aña di edad cu recientemente a participa den e certamen di Miss Teen Aruba International 2023 cu a tuma luga den luna di juli. Den un entrevista cu Bon Dia Aruba Youmika ta conta di su experiencia den e certamen y kico el a siña di esaki.

Youmika a nace na Haiti y cu apenas seis aña di edad e mester a bin Aruba, un pais cu e ta hopi agradecido cune pa tur e oportunidadnan cu el a ricibi.

El a gradua for di EPB San Nicolas den e sector economia. E ta un persona cu gusta tur color y su cuminda faborito ta cuminda di Haiti. E ta describi su mes como un persona hopi lief y cu ta stima bestia.

Esaki tabata e prome experiencia pa Youmika den un certamen di beyesa. El a conta cu e personanan cu a motiv’e y inspir’e pa participa tabata su juffrouw di scol, juf Debra y Sra. Cathy y Tio George di e organisacion di Miss Teen Aruba International. Ademas, el a bisa, cu di su mesun banda e tabata kier participa y biba e experiencia di un certamen di beyesa.

Pa loke ta e experiencia mes durante e certmane, Youmika a conta cu e tabata algo hopi bunita y diferente. “E tabata super y unico. Un experiencia cu si mi tabatin e opcion pa participa un biaha mas mi lo bolbe haci’e,” el a enfatisa.

Durante e certamen e candidatanan a atende varios seminario, tayer y charla ariba diferente aspecto y topico. Un di e aspectonan faborito di Youmika di e experiencia aki ta e momentonan cu nan mester a siña conoce ken nan ta y siña conoce otro tambe. Y danki na e bunita experiencia, Youmika 100% lo recomenda otro hobennan pa durf y participa den e certamen.

Un di Youmika su hobbynan ta practica kickboxing, un deporte cu te dia di awe hopi hende ta wak e como poco comun pa hende muhe, specialmente si e hende muhe of hoben ta den e mundo di beyesa.

El a conta cu el a scoge e deporte aki pasobra e ta yud’e cu diferente aspecto den su bida. “Mi sa cu no tin hopi mucha muhe cu ta practica e deporte ey pero ami a scoge kickboxing pa mi por a siña defende mi mes y bringa cu mi rabianan. Kickboxing a siña mi con pa defende mi mes y con pa tin disciplina,” el a remarca.

Por ultimo, Youmika su mensahe pa hobennan di Aruba: “Mi kier a bisa e hobennan tuma boso estudio na serio pasobra boso ta e futuro di nos pais. Lucha pa loke boso pone boso dilanti y no worry pa loke un hende ta pensa di boso. Focus riba boso mes y boso propio felicidad. Y no lubida nunca di pone Dios na prome luga den tur cos.”