Mediante un comunicado pa prensa, Departamento di Salud Publico (DVG) ta sigura cu den e dianan cu a pasa y den e lunanan cu ta sigui, Aruba lo por sigui experencia basta yobida.
Algun ta mira esaki como un bendicion, pero e por ta tambe inicio di un menasa pa salud publico, si como poblacion no ta consciente y traha hunto pa minimalisa e risico di malesanan transmiti pa sangura.
Manera ta conoci, sangura mester di awa pa por buta su webonan. Mas awa keda para rond di cas despues di yobida, mas oportunidad e sangura tin pa broei dentro di 8-10 dia. Pa por minimalisa e risico cu Aruba por bay experencia un brote di Dengue manera varios otro pais den Latino America, ta importante pa tur hunto ataca e problematica for di su raiz.
Esaki ta encera reduci of stop e sangura di sigui broei na cantidad grandi. Esaki por ser haci door di:
Tira afo of warda tur obheto cu por retene awa innecesariamente paden y rond di cas, scol, trabou y alrededor. Por ehempel scoter bou mata, tire, coy hunga pafo, vas cu mata of flor y mas.
Tapa tur awa para cu tin proposito manera, entre otro, pa muha mata of duna bestia tur dia. Por ehempel hemchi bou airco of bari cu awa di yobida y mas.
Ta extra alerta riba awa para cu proposito di bida pa mata of mascota por ehempel vas cu mata of flor, baki awa di bestia, vijver cu mata di lili y mas.
Di dos (2) paso ta proteha personanan pa bo haya Dengue, esaki bo por haci door di:
Bisti paña cu manga y pia largo durante oranan di atardi pa anochi.
Usa repelente contra sangura riba cuero cu no ta cubri cu paña.
Den espacio pafo di cas cende un mecha of usa bela contra sangura.
Cera porta y bentana di cas prome cu bira scur of usa screen.
Evita di bishita areanan unda ta consciente cu tin hopi sangura.
Spuit paden di cas, camber, oficina y areanan cu ta frecuenta regularmente cu producto pa mata sangura.
Di tres (3) paso ta proteha otronan ora cu tin Dengue of tin sintomanan di Dengue
Esaki ta haci door di evita di haya picadura pa sangura. E sintomanan di Dengue ta entre otro:
Keintura
Dolor di cabes
Biramento di stoma y sacamento
Dolor di weso, joints y musculo
Dolor di wowo
Rash riba curpa
Si algun hende ta presenta e sintomanan aki, consulta dokter di cas.
