E situacion di sushi rond di Aruba ta keda un problema. Mas y mas hende ta saliendo pa dilanti ariba rednan social pa haci un keho publico ariba e situacion fastioso aki cu speransa cu por bin un solucion.
Ayera ariba nan pagina di Facebook oficial, e club YMCA Aruba a haci un publicacion na unda nan a trece pa dilanti un situacion cu nan ta enfrenta, frecuentemente, cu hendenan desconoci cu ta haci uso di nan barinan di sushi y e espacio rond di e barinan di sushi pa pone nan saconan di sushi eynan.
“Lastimamente personanan desconoci a trece nan sushi rond di e bari di sushi di YMCA Dakota. Esaki ta algo cu ta pasa demasiado frecuente. Pa cada bes nos haci esaki limpi nos fundacion mester paga cu tur reto financiero cu nos tin,” e publicacion ta indica.
E organisacion a sigui splica cu manera tur hende sa, YMCA ta un fundacion cu ta depende ariba diferente donacion pa asina fin di luna nan por cubri nan gastonan mensual pa ofrece e mihor servicio. Entre e gastonan aki ta mas cu claro e servicio di recoge sushi.
“Nos tin entre e dos centronan hunto rond di 120 mucha y hoben y nos enfoke primordial ta pa duna e mihor calidad di Tra’i Merdia posibel. No ta posibel pa por paga pa hiba sushi cu no ta di YMCA. No haci nos trabou mas complica pero yuda nos hiba nos fundacion pa dilanti. Ban tene YMCA ARUBA limpi! Ban tene Aruba limpi,” e publicacion a termina.
Mas cu claro e publicacion a ricibi varios reaccion y comentario na unda mayoria di usuario ta condena e acto di e hendenan desconoci aki cu no tin berguensa.
“Un tristesa total, YMCA ta un centro pa mucha nan NO UN DUMP NOBO. Minister Ursell Arends do something about this,” un usuario a comenta.
“Teribel. Unda e parti CIVICO di nos Comunidad di Aruba a keda? NOS MUCHANAN Y HOBENNAN MERECE MIHOR!” otro usuario a bisa den su comentario.
“Hende ey ta hopi sinberguensa di su parti, en bes di yuda e fundacion, ta dun’e mas gasto. Esey bo ta yama un abusador, probechador,” otro a comenta.
E problema di sushi ta creciendo. Dumpnan ilegal ta wordo haya na diferente parti di e isla y situacionnan manera esun cu YMCA ta pasa aden ta sosodiendo frecuentemente. Comunidad ta haci un yamada na e minister encarga pa trece un solucion pa situacionnan lamentabel asina.
