Esaki sigur ta un noticia positivo pa Aruba. Diaranson anochi e yiu di tera, Hernando Romero a ricibi un reconocimento grandi como Miho Locutor y Periodista di Colombia 2015. E ceremonia aki a tuma luga den salon Luis Carlos Galán di e Congreso di Colombia na Bogota.
E reconocimento aki a wordo otorga pa organisacion “Gaceta” cu ta agrupa e gremio periodistico y di locutor di Colombia. E biaha aki e red di periodista aki, mayoria di nan a vota pa e Arubiano aki por a wordo reconoci como Miho Locutor y Periodista di Colombia 2015.
El a ricibi e reconocimento aki fei man di Senador, sr. Juan Manuel Galan kende ta yiu di e lider politico asesina, Luis Carlos Galan. Casualmente na aña 1989, Hernando a ricibi su prome reconocimento fei man di Luis Carlos Galan, y 26 aña despues el a ricibi e reconocimento di Gaceta fei man di su yiu.
Aunke fei mucha e ta bibando na Colombia, Hernando semper a mantene laso estrecho cu su isla natal, y caminda e tin chens pa promove Aruba, e ta haci esey cu masha entusiasmo pa su baranca stima.
