Kevin Wever, yiu di Prome Minister Sra. Evelyn Wever-Croes, a presenta ayera mainta na warda di Polis Shaba hunto cu su abogado y a entrega su mes despues cu tabatin un orden di detencion pa su persona.
E orden di detencion ta relaciona cu e caso di un pleito cu a tuma lugar dia 14 di november 2021, unda cu e yiu di Prome Minister tabata na un restaurant den compania di amigo y familiarnan celebrando e cumpleaños di su pareha. Segun Prome Minister mes a splica den un rueda di prensa den luna di december, su yiu homber a wordo agredi di trishon, di patras, y tambe cu un boter di glas kibra pa un di e yiunan di e conocido comerciante y politico Michael Williams.
E enfrentamento aki a bira un pelea formal den e restaurant cu a resulta den destruccion di propiedad y un di chefnan di e restaurant a resulta herida. Yiu di e mandatario a entrega keho formal como victima na autoridadnan unda cu a bay over na detencion di Nigel Williams, ken despues a wordo laga den libertad. Pareha di e yiu muher di Prome Minister tambe a wordo deteni relaciona cu e caso, ya cu e tambe tabata presente durante e pelea, pero tambe a wordo laga den libertad.
Investigacion lo a tuma lugar pa algun tempo, aunke publicamente no tabata detecta nigun actividad, pero despus di e dianan di fiesta, y basa riba e investgacion te awor, a saca orden di detencion pa yiu di mandatario Wever-Croes y tambe ruman di Nigel Williams, esta Christopher Williams, cu tambe a bay entrega su mes ayera na warda di polis na Shaba.
E caso aki a acapara hopi atencion di comunidad mirando cu ta trata di yiu di prome mandatario di e pais. Durante e rueda di prensa Minister President a enfatisa cu e personalmente no a eherce ningun presion riba ningun departamento y menos den e parti hudicial, como cu esaki no ta cay bao di su ministerio.
Segun ultimo informenan ta confirma, detencion di Kevin Wever a keda prolonga y ainda ta pendiente decision di OM si lo prolonga e detencion di Christopher Williams. Bon Dia Aruba a contacta vocero di Ministerio Publico pa declaracion riba e caso pero no a ricibi respuesta na tempo pa e edicion.
