(AP) – E segundo baby di Prins Harry y Meghan a oficialmente yega. Un baby muhe saludabel cu a nace riba diabierna.

E pareha a ricibi nan yiu ken nan a duna e nomber Lilibet “Lili” Diana Mountbatten-Windsor 11:40am, na Santa Barbara Cottage Hospital na Santa Barbara, California un representante di e famia a revela diadomingo. Nan yiu a nace cu un peso di 7 lbs, 11oz.

Su prome nomber, Lilibet ta un referencia na su bisawela, reina Elizabeth II. Su di dos nomber ta den honor di su wela, princess Diana, mama di prins Harry. E baby ta cai den octavo luga pa e trono di Britain.

“E ta mas di lo ke nos por a imagina, y nos ta keda gradici pa e amor y oracion cu nos a ricibi y sinti di rond mundo. Danki pa boso apoyo incondicional y continuo durante e momentonan special aki” e pareha tambe conoci como duke y dukesa di Sussex a bisa den e publicacion.

E publicacion no a ser compaña pa potretnan di e recien naci. E pareha a bisa tambe cu cualkier persona cu kier manda cualkier tipo di regalo pa e baby, den luga di haci esaki, informa nan mes y sina mas di organisacionnan sin fines di lucro cu ta enfoca nan mes riba hende muhe y mucha muhenan manera Girls Inc, Harvest Home, CAMFED of Myna Mahila Foundation.

Megan a revela cu el a sufri di un perdida di embaraso den juli di aña 2020, expresando cu e tin hopi di conta tocante e experiencia traumatico aki sperando cu e lo por yuda otro muhenan pasando den un situacion manera esun cu el a pasa aden.

Algun luna prome cu e perdida di embaraso, e pareha a revela cu nan ta renuncia na nan responsabilidad den e reino y lo ta mudando for di e palacio, pa motibo cu nan no por mas cu e “actitud nan racista y intrusonan” di e medio Britanico. Aworaki nan ta bibando na Montecito, un area di alto rango serca di Santa Barbara, California.

Na momento cu nan a anuncia nan renuncia, e pareha a laga Oprah Winfey duna un entrevista explosivo na e pareha cual a ser pasa riba television. Den e entrevista aki e pareha a describi con e trato den e palacio realmente tabata ta, y e comentarionan doloroso cu nan yiu homber Archie ricibi, hasta prome cu el a nace. Tabatin preocupacion di con scur e color di Archie su piel lo ta ora cu e nace, y Meghan ta comenta tambe tocante e isolacion cu el a sinti den e palacio, asina extremo cu el a hasta contempla suicidio.

Buckingham Palace a bisa cu e acusacion di racismo cu e pareha a haci ta “preocupante” y cu nan lo trata e tema aki cu e pareha directamente y den priva.

Winfrey y Harry recientemente a colabora tocante salud mental riba un documental pasa pa Apple TV+ “The Me You Can’t See”.

Den e interview, Meghan ta bisa tambe con su yiu Archie no a ricibi e titulo di prins. Harry a bisa cu e famia a corta tur contacto financiero despues cu el a anuncia su plan di retira for di su titulo, y el a logra provee siguridad pa su famia danki na e placa cu su mama, e difunto Princess Diana a laga pa e y su ruman homber.

Aunke Harry a renuncia na su debernan, Harry su luga den e orden di sucesion pa e trono ta keda.

E prome 7 luganan ta keda mescos y ta lo siguiente; Prince Charles, Prince William, e yiunan di Prince William, Prince George, Princess Charlotte y Prince Louis, Princess Harry y su yiu Archie.

Lilibet su nacemento ta move Prince Andrew, ken a nace den aña 1960 pa luga number 9.