(Colprensa) – Dialuna ultimo 25 di september, Fiscalia General di Nacion a establece un acusacion contra Nicolas Petro Burgos pa delitonan di enrikece su mes di manera ilicito y labamento di activos, e cual supuestamente a comete mientras e tabata diputado di Barranquilla y tabata un ficha clave pa e campaña presidencial di su tata den region ey.
Aunke e organismo acusador no a cit’e ainda formalmente, esaki ta indica cu e yiu mayor di e prome mandatario ta bay huicio, loke a demostra cu su colaboracion cu Fiscalia a cay.
Aunke Gustavo Petro a cuminsa un proceso di cooperacion cu autoridadnan y a compromete su mes den negociacion pa duna informacion clave pa e investigacion di Fiscalia, e ex-diputado di Atlantico a extende su tempo pa presenta su declaracion di colaboracion debi na nacemento di su yiu y pa e renuncia di e abogado David Teleki, ken inicialmente tabatin su caso.
Di acuerdo cu su abogado nobo, Estewing Arteaga un yamada na huicio ta algo cu no ta sigur ainda y ademas, nan no ta conoce e motibonan a fondo di pakico Fiscalia a tuma e decision, te ainda e ex-diputado tin tempo di utilisa algun recursonan si e lo haci esey prome cu huicio.
“Awe ta inicia e lucha di mi bida, mi tabata sa cu Fiscalia di Barbosa no tabata di confia y awe nan a demostra esey. Nan a presiona te limite cu e unico intencion di a mi bira un arma contra mi tata. Ma dicidi di lanta y no pone mi di rudia dilanti e burdugu,” Petro Burgos a skirbi riba red social X.
Nicolas Petro ta acusa di ricibi hopi placa na aña 2022 di parti di e ex-narcotraficante Samuel Santander Lopesierra, conoci como ‘El Hombre Marlboro’ y di e contratista Alfonso ‘El Turco’ Hilsaca, ken presuntamente tin vinculo cu gruponan paramilitar. Nicolas a bisa nan cu e placa ey supuestamente tabata pa financia e campaña presidencial di su tata, pero Fiscalia ta sigura cu el a keda cu e placa pa tin un bida cu luhonan.
