Enfrentando scrutinio intenso for di Presidente Donald Trump y su aliadonan Republicnano, Hunter Biden a bisa cu ta retirando for di hunta directiva di un compania di capital priva cu sosten Chines fin di luna, como parti di un promesa pa no traha den nomber di ningun compania cu doño stranhero si su tata gana e presidencia.
Biden, e yiu di 49 aña di edad di candidato presidencial Joe Biden, a revela su plan diadomingo den un post riba internet skirbi pa su abogado, George Mesires, kende a delinea un defensa di e trabou di e Biden hoben na Ucrania y China, cual a ser revela como un di e liñanan principal di atake di Trump contra tata di Hunter.
Joe Biden, papiando cu reporteronan despues di un forum di sindicato na Des Moines, Iowa, a bisa cu su yiu no a discuti e decision cune prome cu a post e declaracion.
Y Biden a priminti di prohibi su famia di ocupa cualkier cargo den Cas Blanco, y a bisa cu nan no lo ‘sinta den reunionnan comosifuera nan ta miembro di Gabinete’. Esey tabata un critica riba Trump, kende tin su yiu Ivanka y casa Jared Kushner como consehero. Biden no a bisa si su promesa ta nifica cu su casa, Jill Biden, no lo ricibi e cargo tradicionalmente asigna na prome damanan, si e gana.
Trump a reacciona riba Twitter: “Wow! Hunter Biden ta forsa pa retira di un compania Chines. Awo mira e Fake News bras’e cu nan brasa vet y protectivo. Unicamente preguntanan facil p’e, por fabor!”
Trabou di Hunter Biden den exterior ta den centro di e investigacion di impeachment di Trump, kende awo a admiti di pidi podernan stranhero pa investiga e negoshinan di Hunter Biden den exterior.
Ademas di Ucrania, Trump a curasha China pa investiga trabou di Hunter Biden na e pais ey, acusando e di a gana $1.5 biyon for di un acuerdo ‘sweetheart’ di negoshi.
Abogado principal di e presidente, Rudy Giuliani, tambe ta bou scrutinio creciente pa su esfuersonan pa investiga e background di negoshi di Hunter Biden. Siman pasa, dos comerciante involucra den esfuersonan di Giuliani pa investiga Hunter Biden su negoshinan na Ucrania a keda acusa di violacion di ley federal di financiamento di campaña.
Sinembargo, republicanonan a reacciona na e decision di Biden, di retira di e compania cu sosten Chines, BHR Equity Investment Fund Management Co., cu skepticismo.
“Mi ta kere esaki ta djis un otro manera pa salba un campaña cu ta muriendo”, Doug Collins, Rep. Georgia a bisa riba television. “E sa cu e ta den problema y esaki ta djis otro manera pa purba elimina atencion.”
Mesires a bisa cu Hunter Biden a traha como un miembro di e hunta directiva, sin pago, ‘basa riba su interes den busca manera pa trece capital Chines den mercadonan internacional’.
