Nos tin un siman ta pasando den un impasse bastante desagradabel cu e Gobierno Venezolano, debi na nan decision di cera tur frontera cu Aruba, Boneiro y Corsou. Cu consecuencia esaki a crea un tension grandi entre reino Hulandes y Venezuela. Esaki ta segun e relato cu Bon Dia Aruba a ricibi.
Directie Luchtvaart na Aruba y INAC na Venezuela a logra yega na un acuerdo pa pone tres vuelo cu lo bay trese bek e residentenan di nos isla, for di Venezuela. E vuelonan lo sali for di Valencia, Maracaibo y Las Piedras cu destino directo pa Aruba y lo bay asina te ora cu saca tur nos residentenan for di e pais aki. Despues di basta negociacion cu e gobierno di Venezuela, a logra acorda cu nan lo permiti salida di e residentenan di Aruba, tanto e ciudadanonan Hulandes, pero tambe esunnan cu ta residencia legalmente akinan.
Den e comunicacion cu tabatin entre Aruba y Venezuela, a enfatisa den e hecho cu e situacion di nos residentenan local cu ta pega na Venezuela no ta humano. Teniendo na cuenta cu nos residentenan local cu ta aya na Venezuela, a bay cu un budget pa algun dia, pero awor cu e ceramento di frontera aki logicamente nan placa lo ta cabando of lo a caba. Posiblemente lo por yega na un solucion pa e impasse cu tin diabierna awor, pero pa tur siguridad ciudadanonan ta keda avisa pa no bay Venezuela den e temporada aki.
“Loke nos Gobierno ta sugeri na tur esunnan cu tin pensa of plania di biaha pa Venezuela, ta pa warda y no bay pa awor. Mester corda cu ainda ta existi e situacion tenso entre Venezuela y Caribe Hulandes, pasobra e prohibicion ta vigente keto bay, cual ta haci cu nos gobierno no por garantisa e siguridad y integridad di esunnan cu dicidi di bay Venezuela”, e relato ta bisa.
