Satisfactorio, of no?

A bira custumber, no cerca nos so, pa evalua e prome 100 dia di un gobierno. Aunke e ta un momento di evaluacion subhetivo, laga nos haci un analisis breve di loke nos a mira den e prome tres luna y pico aki. Prome aspecto cu lo bin na mente ta e estado di entrega di administracion publico pa e gabinete anterior. Nos tin e firme impresion cu e traslado di gobernacion a cana leu di loke por considera normal, y den esaki esun cu ta carga e responsabilidad ta e gabinete saliente. Si no ta posibel pa pone hende personalmente responsabel pa e traspaso caotico aki, causa intencionalmente, lo ta bon pa haci esaki imposibel pa futuro. Nos no por yama nos mes un pais ordena y civilisa, mientras cu na salida di un gobierno ta perhudica nos pais, no e tres partidonan di e coalicion, cu e actonan indebido aki. Mester crea e cuadro legal y administrativo pa esaki.

E prome problema cu e gabinete nobo a topa tabata naturalmente e situacion financiero, cual logicamente no a keda resolvi, y tin amigo y enemigo pendiente di loke ta bay sucede proximamente. Esaki lo haya claridad ora e presupuesto 2018 keda cla. En todo caso e prome accion tabata pa presenta y haya aproba un presupuesto complementario pa 2017, cu a autorisa fia mas placa ainda pa por cera aña. Pio ta cu e deficit ta bay, segun ley (LAft) pa 2018 pa compensa, mientras cu riba su mes 2018 tabata mustra caba un deficit di casi 200 miyon. Presupuesto 2018 no a keda cla ainda, pero si a entrega na CAft un nota provisional tocante esaki, riba cual pronto lo bin un contesta di e organismo consultativo aki.

E ausencia di un presupuesto aproba, ta causa cierto incertidumbre pa cada ministerio kico nan por bay haci den e aña aki. E accionnan den e prome lunanan ta keda limita na asunto cu no ta rekeri fondo cu mester haya aprobacion ainda den e presupuesto 2018. Di tur manera e atencion mayor publico a bay na e casonan den corte cu a surgi a base di e prome pasonan tuma den cierto caso. Mester bisa cu den esakinan e gabinete nobo no tabata asina exitoso, y ta parce cu emocion tabata un guia mas grandi cu sentido comun. Den cierto di nan gobierno a haya parcialmente rason, y en todo caso e veredictonan ta indica na un manera cla unda por cana y unda no. No ta recomendabel pa keda hinca esfuerso den bataya legal. Tin cos mas importante pa haci.

Tin otro medida tuma tempran cu despues di 100 dia ta exigi un contesta mas cla, ya cu e asunto no por keda asina. Nos ta referi por ehemplo na e situacion di parkeer den centro di ciudad, unda un parti di e publico lo ta contento pasobra nan no mester paga mas. Otro parti di publico sin embargo ta mustra riba e hecho cu ta dificil pa haya luga di parkeer pasobra e incentiva cu tabatin pa empleado parkeer unda cliente mester por laga nan vehiculo, a disparce. Riba esey, ta bira obvio cu e sistema di vak geel no ta satisface, lagando un cantidad di espacio obligatoriamente bashi den oranan clave, unda lo por a gana mas entrada si tabatin un solo categoria blanco so. Esaki ta rekeri accion pronto.

Un asunto cu a capta hopi atencion ta e anuncio di ministro encarga cu enseñansa cu e tin intencion di pone dirigencia di e enseñansa publico den man di un fundacion, cu e meta di pone e maneho diario na mas distancia di e nivel politico. E critica ta pakico no a papia cu e interesadonan prome. Esey ta corecto, pero imagina bo cu e ministro a bay papia cu por ehemplo sindicato, sin cu resto di comunidad sa. Probablemente lo el a haya e critica cu e ta purba haci cos scondi. Di e manera aki probablemente ningun manera ta satisface tur hende nunca. Importante ta cu e consultanan ta andando y ta di spera cu ta mantene transparencia den esaki. E caso di e salario minimo ta un poco diferente, den sentido cu tin un trayecto completamente defini pa ley cu mester cana pa mira kico ta posibel.

Manera por a anticipa, a bin cierto cambio den dirigencia di varios empresa estatal y fundacion liga na gobernacion. Esun a capta atencion pa motibo di caso den corte, pero di otro caso nos ta tende, salvo algun excepcion, solamente den e circuito di rumor. Nos ta kere cu e gabinete den su totalidad lo mester duna mas claridad den esaki y publica abiertamente tur e cambionan cu a haci o ta bay haci den e posicionnan aki. No ta normal cu mester consulta registro na Camara di Comercio pa averigua si cambio a tuma luga. Transparencia tambe tabata un di e promesanan haci den e plan di gobernacion, pues practica esaki.

Pa resumi loke nos a mira den 100 dia, no ta ni impresionante ni decepcionante. Un presupuesto realistico y bon balansa sin embargo lo ta e trabao mas importante di e dianan aki cu nos kier mira.