Marca di paña y sapato di Kanye West, Yeezy, a ricibi un prestamo di fondo di gobierno pa alivio di pandemia, na balor di entre $2miyon -$5 miyon, yudando e pa mantene 106 persona na trabou, segun datonan revela pa Departamento di Tesoro Mericano ayera.
Yeezy, miho conoci pa su sapato deportivo di $250, a caba di anuncia un acuerdo mayor cu Gap cu lo pone e famoso diseña hoodies y T-shirts cu lo ser bendi den e 1,100 tienda di e cadena rond mundo.
Weekend ultimo, West a anuncia riba Twitter cu e tabata drentando carera pa presidente.
Nomber di algun otro tienda famoso, cual nan negoshi a keda destrui pa ceramento di tienda rond di e pais, tambe a ricibi prestamonan di 1% cu por keda sin paga si cumpli cu metanan di tene trahado na trabou. E lista a inclui Oscar de la Renta y Vera Wang, como tambe Hickey Freeman, tur cual a haya prestamo di entre $2miyon -$5 miyon.
Untuckit, un tienda di camisa cu 85 localidad, tabatin dos prestamo entre $5 miyon y $10 miyon. Iconix Brand Group, un compania publico doño di Candie’s, Joe Boxer y Ed Hardy, tambe a ricibi entre $1 miyon y $2 miyon.
Tiendanan y fabricanan a mira nan entrada cay considerablemente pa motibo di e ceramento, y tambe nan a keda cu henter un temporada di paña cu nan no a logra bende.
