Yana, Vasilena, Kyanni y Silvia, Un Grupo di hobennan cu a uni pa cumpli un soño en comun apesar di e luchanan cu nan ta enfrenta como studiante internacional

Yana Hristova di 19 aña di edad, Vasilena Ivanova di 20 aña di edad, ambos for di Bulgaria conhuntamente cu Kyanni Atmopawiro di 20 aña di edad di Sint Maarten y Silvia Dirksz di 24 aña di edad di Aruba ta forma e grupo di hobennan na Hulanda, kendenan a sali for di nan pais pa cumpli un soño y awe nan ta creando un pelicula como parti di nan tarea pa scol.

Yana ta conta cu ora cu el a muda bay Hulanda, e tabata sinti su mes su so, expresando cu “e tabata un poco confuso pa motibo cu mi tabata leu di mi pareha, famia y amistadnan. Mi mester a adapta y custuma na e bida aki na Hulanda cual ta completamente diferente na mi pais natal. E tabata un desafio pa mi mester biba miso,” agregando cu hopi ta pensa cu e bida di un studiante, specialmente studiante den exterior, ta un parti di bo bida unda cu bo ta sali hopi y disfruta di bo hubentud pero en realidad e no ta nada asina.

Aunke e imagen general di e bida di un studiante ta uno hopi biaha eroneo, e ta diferente pa cada studiante. Den caso di Vasilena, kende tambe ta di Bulgaria, el a experiencia un “shock cultural” pero afortunadamente el a conoce un grupo di persona kendenan a yud’e supera e shock inicial y difruta di e experiencia. Sinembargo, e tambe ta comparti e sentimento cu no ta papia hopi tocante e aspecto di soledad ora cu un studiante ta bay biba afo, y ta kere cu mester trece mas atencion na esaki pa yuda studiantenan no sinti nan mes nan afo den e lucha aki cu ta comun pa varios.

Kyanni a agrega cu ademas di soledad, tambe mester presta atencion na e salud mental di e studiantenan aki, “mi ta kere cu adultonan por tin mas compasion y empatia pa e studiantenan internacional pa motibo cu nos ta lidia cu un gran variedad di problema manera nos salud mental, problema financiero, problema pa haya vivienda y den e centro di tur cos, nos educacion.”

Den e estudio cu e grupo di studiante aki ta completando, un di e tareanan cu nan a haya ta di crea un pelicula completamente independiente, es decir, nan mester pasa door di full e proceso nan mes, cuminsando for di financia e pelicula, na crea e guion, produci, graba, promove y lansa e pelicula.

E ta un tarea sumamente grandi, mirando cu nan ta studiantenan internacional den un pais unda cu nan ta nan so y leu for di cas, Yana ta conta cu “na momento cu mi a haya sa cu nos mester traha riba e produccion di un pelicula cortico, mi tabata preocupa di con nos como ekipo lo por duna bida na e guion cu nos a crea y ta satisfecho cu e producto final. Como director di fotografia, mi rol ta crucial mirando cu mi mester sigura cu mi tin e angulo corecto, e luznan ta adecua y cu mi lo captura e emocion di e actornan.”

Aunke e tabata nervioso, y sinti e presion, tambe tabatin un sentimento di alivio y suerte, pa motibo cu segun Yana, traha den e ekipo aki tabata algo semper divertido mas sinembargo profesional. Kyanni a expresa cu “aunke mi tabata preocupa pa motibo cu mi no tin experiencia den e industria di pelicula, mi a realisa cu esaki ta e motibo exacto dicon mi ta den e estudio aki; pa siña! Tin hopi trabao cu mester inverti den e produccion di un pelicula, sinembargo traha cu e grupo creativo aki a haci e proceso uno hopi mas manehabel.”

Vasilena ta comparti e sentimento aki, comentando cu pa medio di e proyecto aki el a siña cosnan cu nunca e lo por a siña si e no lo a haci e proyecto aki, splicando cu un di e cosnan cu el a siña ta cu tur logistica mester ser pensa cautelosamente y calcula, “antes, mi tabata wak un pelicula sin sa ni pensa di con hopi ora di labor fuerte a ser inverti den e creacion di un proyecto asina.”

Silvia a expresa cu di e experiencia aki el a sina cu “semper bo mester ta dispuesto pa sigui cu e coriente. Durante grabacion, nos a enfrenta cu hopi diferente reto y problema cu na e momento nos a pensa nos no lo por resolve, pa motibo cu nos tur tabatin hopi stress,” sinembargo pa medio di sinta como un ekipo entre tur e caos, nan por a yega na solucionnan di un manera facil.

El a comparti como conseho na tur studiantenan cu pronto lo studia leu for di nan pais, bisando “hopi di nos problemanan a keda resolvi pa medo di adapta nos mes na e situacion presente. Mi por bisa cu bida na Hulanda ta mesun cos. Hulanda ta un pais cu ta sigui bay y lo lagabo atras si bo no adapta. Aprecia bo amistadnan, y tin un sistema di sosten. E ta okay pa pidi ayudo, rondona bo mes cu hendenan cu tambe ta dispuesto na adapta, y crece cubo di un manera positivo.”