Grenspolitie riba peticion di Ministerio Publico, ta bay sigui para biaheronan cu debe di boet durante e periodo di vakantie cu ta nos dilanti. Personanan cu debe boet ta core riesgo di wordo deteni dor di Grenspolitie y di lo no por sigui cu nan biahe te cu nan cumpli cu pagonan di nan multa(nan).
Esaki por tin, entre otro, como consecuencia cu hende ta perde avion. Si resulta cu un persona no por (o no kier) paga e boet, CEA lo traslada e persona aki pa KIA pa e cumpli cu su detencion. Pa cu e meta aki KIA a prepara caba celnan tanto pa hende homber como hende muher.
Ministerio Publico ta haci un yamado urgente na tur hende, specialmente na biaheronan, cu tin debe di boet pa paga esaki mas liher posible. Por paga online via cuenta bancario 4000905 di ArubaBank, bao mencion di e parketnummer (cu ta cuminza cu un P).
Tambe bo persona por paga na caha di Ministerio Publico despues di haci un afspraak via e website (www.omaruba.com). Si bo tin algun pregunta tocante bo boet, por manda esaki pa info@omaruba.aw. Bo por haci uso alabes di e formulario di contacto riba e website pa haci pregunta.
