(CuraçaoChronicle) – Den un episodio nobo cu a trece dilanti preocupacion, dos ciudadano Venezolano a keda aresta na Willemstad y transferi na e departamento di inmigracion pa detencion.
E situacion aki a caba cu e pasenshi di e comunidad Venezolano, cual ta cansa di varios arestonan inhusto, e detencion sin speransa di e refugiadonan y migrantenan den crisis, e aumento di muchanan sin hogar, explotacion laboral y xenofobia na Corsou. “Nos a wanta suficiente,” Natalia Josefina Molina Rodriguez, un representante di e comunidad Venezolano na Corsou a declara. El a usa su bos pa demanda husticia, un fin na opresion y e reconocimento mereci di e contribucion valioso cu Venezolanonan a haci na e sociedad di Corsou.
Violacion di derecho
E aresto a tuma luga dia 27 di juni durante control di polis. Segun Natalia Josefina Molina Rodriguez, e arestonan aki ta constitui un violacion di inmigrantenan su derecho. E ta enfatisa cu e individuonan aki tin e derecho di ricibi informacion y protecion, di mesun manera cu ta premira den cualkier otro parti di mundo. Nan no mester ta suheta na un proceso legal y administrativo cu ta expone nan na deportacion sin considera nan argumentonan y circunstancianan individual.
E comunidad ta percibi e gobierno su argumento di integra Venezolanonan den bida di social na corsou como falso y cu falta di sinceridad, manera Rodriguez a indica. E ta insisti cu tin un necesidad urgente pa reevalua e politica di inmigracion actual, cual segun su persona ta condena varios na sufrimento y incertidumbre innecesario.
“Hopi Venezolano ta sinti nan mes explota y persigui, ambos riba caya y den nan trabao. Nos ta kere firmemente cu e termino ‘ilegal’ ta stigmatisa nos y ta viola nos derecho como ciudadanonan completo. Nos no ta criminal ni tampoco indocumenta. Nos ta cumpli cu nos obligacionnan di paga impuesto y ta traha pa sostene nos famianan. E momento pa haya husticia a yega,” el a declara.
Criticanan tambe ta extende na e condicionnan laboral cu hopi di e Venezolanonan ta enfrenta riba e isla. Varios di nan ta traha mas di 10 ora pa dia y sin ningun protecion social, contribuyendo na e desaroyo y bienestar di corsou. Rodriguez a haci un yamado fuerte na e gobierno di Corsou y organisacionnan internacional manera International Organization for Migration (IOM) y Halto comisario pa refugiadonan di Nacionnnan Uni pa colabora den establece un politica coherente cu ta beneficia e comunidad Venezolano.
Den e buskeda di husticia, e organisacion Human Rights Defense Curaçao actualmente ta provee asistencia pa e detencionnan inhusto. Rodriguez orguyosamente ta enfatisa cu Venezolanonan ta sinti profundamente conecta na nan herencia Latino Americano y Venezolano y nan ta demanda respet y husticia pa e comunidad, cual segun su persona, ta un parti esencial di Corsou.
