Relaciona cu trucknan di chica pos cu ta basha awa di pos den damnan, Dienst Warenkeuring en Hygiëne (departamento di higiena y control di producto) ta spera pa pueblo ehecuta un control social ora ta trata di persona of compania cu ta haci cosnan ilegal y dañino pa comunidad. E departamento ta informa tambe riba proceso di control di awa.
Manera nos a publica poco siman atras, a wordo nota cu algun trucknan di chica pos ta basha nan awa di pos den damnan. Aunke esaki ta ilegal segun articulo 16 di Politieverordening manera varios instancia di gobierno a informa, no tabatin bista riba kico e consecuencia por ta pa salud publico.
Seccion Dienst Warenkeuring en Hygiëne (DWH) di Departamento di Salud Publico (Despa) ta esnan encarga cu control di awanan, sea den dam of den lama. Yvette Geerman, hefe di departamento DWH a splica con e proceso di control ta cana y dicon e awanan ta di importancia pa comunidad.
Loke ta peligroso segun sra. Geerman ora trucknan di chica pos dump nan sushi den damnan ta cu lo contamina e awa cu bacteria E. coli cu ta presente den pupu di bestia y hende. E. coli por causa varios infeccion y den casonan severo por te hasta causa morto.
Pa e departamento ta importante pa pueblo keda cu wowo habri pa situacionnan straño cu ta pasa riba caya, pasobra e departamento no por ta presente tur caminda 24/7. Pues pueblo mester por ehecuta un control social y comunica cu instancianan ora ta necesario.
“E damnan no solamente ta pa wanta e awasero cu cay, nos sa re uza esaki pa por ehempel nos cunukeronan haci uzo di dje. E awa den lama tambe ta importante pasobra tin hende cu ta uza esaki ora nan ta malo”. Alabes e consecuencianan no ta solamente pa comunidad, si no pa bestianan tambe.
Test pa E. coli den dam y lama
Loke ta wordo getest ta e cantidad di bacteria E. coli den e awanan, via seccion microbiologia di Landslaboratorium. E awa mester cumpli cu cierto normanan internacional despues cu e wordo analisa na laboratorio. Pues DWH ta colabora cu Landslaboratorium, DOW y Santa Rosa, cual ta depende riba e departamento pa sigura cu awa ta limpi pa uzo di cunukeronan.
DWH ta ehecuta e control di awa di dam y lama mensualmente. Ora cu e departamento detecta cu lo por tin algo straño cu e awanan, ta haci e control mas biaha. Den caso cu e awa pasa e testnan, por haci uzo di nan. Y ora e no pasa e testnan e departamento ta avisa publico pa no haci uzo di e awa sea pa bebe of otro actividad.
“Ora nos haya awa contamina, cual sa pasa den practica, hopi frecuentemente ta pasobra hende ta reporta cu nan a bira malo. Sinembargo nos sa detecta awa contamina via nos control regular. Loke nos ta haci e ora ey entre otro ta sigui tuma muestra mientras ta haci limpiesa y kita e contaminacion pa medio di basha cloro den e dam.”
E proceso cu e departamento ta ehecuta ta continua te cu por constata via e testnan di laboratorio cu e calidad di e awa ta cumpli cu normanan.
Awa potabel
Pa loke ta trata awa potabel, e departamento ta test esaki mas frecuentemente.
“Nos ta traha hopi cerca cu WEB. Nos ta encarga cu control di e awa riba nivel microbiologico, mientras WEB ta encarga cu controla riba nivel kimico. Pa medio di monitor regularmente y conhuntamente cu WEB, ta sigura cu calidad di awa riba Aruba ta riba un nivel halto”, segun sra. Geerman.
