Pa sigura cu preparacion di cuminda ta bay na un forma responsabel y na final e cuminda presenta ta di bon calidad, limpiesa den forma di higiena ta e prome di e cinco yabinan pa cu “Food safety”, esta siguridad di alimento.
“Food safety” ta un topico cu ta keda importante y ta esencial pa comparti informacion pa tanto esun cu ta prepara cuminda pa sirbi na cliente den restaurant, como pa esun cu ta prepara su mesun cuminda na cas ta na altura di con pa sigura cu su cuminda ta di bon calidad.
E prome di e cinco ‘yabinan’ di bon practica pa cu siguridad di cuminda ta Limpiesa. E tip principal ta labamento di man. Esun cu ta traha den cushina, sea ta na un negoshi of na cas, mester laba su man na e forma corecto y frecuentemente. E prome paso ta pa laba man prome cu cuminsa traha cu cualkier ingrediente. Cada biaha cu traha cu un producto of ingrediente diferente, mester laba man prome cu sigui.
Si e persona a traha cu carni curu e mester laba su man prome cu e mishi cu e mesun carni bek ora cu e carni ta cushina. Ademas, si e ta bay traha un salada, e mester laba su man atrobe si a mishi cu carni curu.Labamento di man ta preveni cu bacteria ta pasa di un cuminda curu pa esun cushina caba, pues pa preveni “cross contamination”.
Ta crucial pa laba man bon despues di uza baño! Limpiesa di tur material y aparato di cushina tambe ta hopi importante. Laba y desinfecta tur cos bon prome y despues cu haci uzo di nan. Semper proteha e cushina y area di preparacion contra di insecto y otro animal, Yvette Geerman, hefe di Seccion di Higiena di DESPA ta subraya.
Un otro punto di atencion ta e uzo di holoshi y joya manera renchi na e mannan mientras cu ta prepara cuminda. Bacteria por keda pega y crece den y riba e obhetonan aki y por pasa over pa cuminda. Ta conseha pa kita holoshi y joya durante di preparacion di cuminda.
Huñanan mester ta cortico y limpi. Preferiblemente no uza pintura di huña y si uz’e mester bisti handschoen. Sra. Geerman a subraya cu e aplicacion di huña falso y producto manera acrilico tambe ta trece risico di contaminacion di cuminda. Ta conseha, den e caso aki, pa uza handschoen cu despues di un uza ta tira afo, pa evita cu un pida di acrilico of un huña falso cay den e cuminda durante di preparacion.Uzo di e tipo di handschoen aki ta conta tambe si bo tin herida na bo dede of man.
Tur e tipnan cu ta conta pa cushina di restaurant ta conta pa cushinamento na cas tambe, Yvette Geerman a conclui bisando.
Comunicado Despa
