Ayera diaranson, Biblioteca di Aruba a anuncia cu for di dia 22 te cu 26 april ta bay tuma luga e XI Sustainable Education Symposium Aruba 2024 , un simposio di sostenibilidad di Biblioteca Nacional Aruba.

For di 11 aña caba, nan ta bin organisando e simposio e cual tabatin varios luna di deliberacion y di pensamentonan pa trece dilanti, e aña aki e simposio ta bay tin e lema di “Ban Planta” manera director di Biblioteca Nacional Aruba Astrid Britten a informa.

Esaki ta bay cuminsa dia 22 di april te 26 di april pa scolnan secundario cu invitadonan importante como orador manera Gregory Fung A. Fat presidente di United Farmers Aruba, Roselinde Barros-Poels propietario di Living Soil Aruba, Rendell de Kort, economista di Desaroyo di Cornerstone Economics, e cunukero Diego de Cuba y tambe Ludwig Rasmijn.

Nataly Maduro director di Santa Rosa a splica cu esaki ta nan di 10 aña consecutivo cu nan traha hunto cu Biblioteca Nacional Aruba pa motibo cu ta un conferencia pa scolnan secundario pero nan ta mira cu produccion di cuminda mundialmente ta hayando hopi atencion, cu tin hopi limitacion pa cu e cambio climatico y produccion di cuminda ta birando mas dificil.

Maduro a sigura cu loke nan kier logra ta pa e muchanan di scolnan secundario por wordo stimula den studionan cu tin di haber cu e area di produccion di cuminda y mediante varios presentacion nan kier ilustra con plantamento ta bin cambiando den tempo y cu e tecnologia.

Di su parti, Ronny R. Alders ken ta e coordinador di e simposio aki a declara cu esaki ta basa den e metanan di desaroyo sostenibel number 15 e cual tin un tema importante ya cu mundo a pasa den calamidad di virus di Covid-19 loke a duna tempo pa pensa kico ta importante ora hendenan mester tin cuminda riba mesa.

“Nos mester planta mas y importa menos cuminda pa nos mes aki na Aruba,” el a sigura.

Pa diahuebs 25 di april lo tin un “Evening of letters” e cual ta bay tuma luga na Cas di Cultura pa comunidad en general sin ni un costo, portanan ta habri 5.30 y evento mes ta cuminsa 7 or y lo caba 9 or di anochi cu e presencia di venders cu nan productonan sostenibel di calidad.

Pa e motibo aki nan ta invita comunidad di Aruba pa bay na Cas di Cultura dia 25 di april pa scucha e expertonan den area aki cu tambe lo tin un panel di pregunta di publico.