Diasabra anochi den Aruba Entertainment Center a tuma luga eleccion di Reina Infantil y Hubenil na unda Aruba a cera conoci cu su Reina Infantil y Reina Hubenil pa Carnaval 70. Districto di Noord a resulta e ganador grandi di e anochi bayendo cu tur dos corona den man di Xeena Dijkhoff y Jaylienne Tromp.
A pesar cu e anochi a cuminsa cu algun contratiempo, e show tabata uno bunita y e tur reina a duna un bunita presentacion riba escenario.
Segun schedule, e show mester a cuminsa pa 7or di anochi, pero tabatin contratiempo cu paña di e participantenan pa loke ta e show di apertura. SMAC (Stichting Maneho di Aruba su Carnaval), ta encarga cu e paña pa apertura, y speech, di e candidatanan. Un cambio cu nan a trece aña pasa caba na unda e candidatanan no mester presenta cu nan propio costume carnavalesco, pero nan tur ta haya e mesun costume for di SMAC.
Pa 7or di anochi ainda e paña di apertura no a yega, ni pa e candidatanan di Reina Infantil como tampoco pa e candidatanan di Reina Hubenil. Esaki a haci cu e show a cuminsa laat, a cuminsa despues di 8or di anochi.
Candidatanan tabata preparando pa subi escenario cu otro paña, pero na ultimo momento e pañanan a yega y show por a cuminsa.
Un show di apertura hopi bunita bao direccion di Marisol Peña y presenta pa e grupo di baile NTG & NLG dancers cu a compaña e candidatanan riba escenario. Despues di show di apertura mesora a pasa pa e parti inoficial na unda tur candidata a presenta nan speech y despues a sigui pa e parti na unda cada candidata ta presenta nan show oficial.
Den e categoria infantil tabatin un total di cuater candidata, Xeena Dijkhoff representando Districto di Noord, Ciara Winterdaal representando Don Flip Carnival Group, Adelyne Thiel representando Little Diamonds Carnival Group y Savannah De Lisle representando Champagne Carnival Group y Districto di Paradera.
Xeena Dijkhoff di Districto Noord a keda corona como e di 47 Reina Hubenil di Aruba su Carnaval, y a logra bay cu e premio di Popular, Best Speech y Best Carnival Dress.
Representante di Don Flip Carnival Group, Ciara Winterdaal, a bay cu e premio di Best Show y Primera Finalista. Savannah De Lisle di Champagne Kids Carnival Group y Districto di Paradera a bay cu e titulo di Segunda Finalista y Adelyne Thiel representando Little Diamonds Carnival Group a sali Tercera Finalista.
Den categoria hubenil tabatin un total di seis candidata, Aliyah Ridderstap representando Colegio San Antonio y Dushi Carnival Group, Jaidyleen Tromp representando Champagne Carnival Group y NTG Dancers, Guizza Steenvoorde representando TOB Carnival Group y Colegio Arubano, Joleimar Morillo representando Kiwanis Builders Club Mon Plaisir College y Empire Carnival Group, Jaysi-Ann Croes representando Royal Carnival Group y Jaylienne Tromp representando Districto di Noord y Infinity Carnival Group.
Jaylienne Tromp di Districto di Noord y Infinity Carnival Group a keda corona como e di 59 Reina Hubenil di Aruba su Carnaval y a bay cu e premio di Best Show y Best Carnival Dress.
Joleimar Morillo di Kiwanis Builders Club Mon Plaisir College y Empire Carnival Group a sali Primera Finalista, Jaidyleen Tromp di Champagne Carnival Group y NTG Dancers a keda eligi como Segunda Finalista y Guizza Steenvoorde di TOB Carnival Group y Colegio Arubano a sali Tercera Finalista y a bay cu e premio di Best Speech tambe.
Un anochi cu tabata yen di fantasia y creatividad na unda tur candidata a trece diferente mensahe positivo pa comunidad carnavalesco di Aruba. Pabien na tur e ganadoranan.
