Loke un tempo a cuminsa como experimento den e Oceanium di Diergaarde Blijdorp na Rotterdam, a crece y bira RoffaReefs na Boneiro. Un organisacion cu ta dedica su mes na salba e coral dor di cria pisca. E metodo a resulta asina exitoso cu ta necesario pa pasa pa un escala mas grandi. Como partner di prome ora, Diergaarde Blijdorp awor a inclui RoffaReefs definitivamente den su hub Caribense. Wereld Natuur Fonds (WWF-NL) ta hopi contento cu e desaroyo aki.
Mescos cu Diergaarde Blijdorp, WWF-NL tambe tin laso estrecho ku RoffaReefs. Cu un malesa serio di coral cu ta sigui plama den Caribe y otro areanan, e tecnica di RoffaReefs ta mas relevante y urgente cu nunca. Despues di e resultadonan prometedor di fundado Sander van Lopik y su ekipo, WWF-NL a dicidi na yuda e start up aki na 2022. WWF-NL y Diergaarde Blijdorp ta masha bon partner pa basta tempo caba, loke ta haci e situacion aki ainda mas bunita, caminda e ambicionnan separa awor ta uni den e hub ultramarino aki di e parke di bestia di Rotterdam. For di e hub na Boneiro, Diergaarde Blijdorp lo realisa y sostene proyectonan local y regional di conservacion di naturalesa. Cu e bishita di director di Blijdorp Erik Zevenbergen, no solamente e lasonan ta keda reforsa, pero ademas ta ser intensifica.
Kiko RoffaReefs ta haci?
Fundado di RoffaReefs, Sander van Lopik, a mira basta aña pasa cu mundialmente no ta bayendo bon cu e coralnan. Enbes di cria y planta coral, el a dicidi na investiga un otro solucion pa e problema. Coral ta un organismo bibo cu ta depende di piscanan cu ta mantene. Manera e famoso doktersvis. Dor di decadanan di sobrepesca, cambio di clima y polucion, awor na hopi luga rond mundo tin menos pisca pa mantene e rifnan di coral y laga nan florece. Cu tur consecuencia cu esaki ta trece cune.
Barera indispensabel
Na Rotterdam, RoffaReefs a desaroya un metodo pa captura y cria webo di pisca y pone esakinan back den e coral. Despues di basta aña di testmento den e ambiente controla di un Acuario, RoffaReefs a tribi tuma e paso pa bay Boneiro. Eynan a resulta despues di hopi experimentacion, cu e tecnica ta aplicabel tambe den lama grandi.
Danki na yudansa di e cooperativa local di pesca Piskabon, organisacionnan di naturalesa manera STINAPA, Dutch Caribbean Nature Alliance (DCNA) y tambe WWF-NL, RoffaReefs por a perfecciona e metodo y asina logra e prome resultadonan importante. E speransa y expectativa ta cu pa medio di e esfuersonan combina, mas organisacion lo uni nan mes na e proyecto prometedor y importante aki. Pasobra coral cu ta saludabel ta forma un barera natural y indispensabel contra e subida di nivel di lama, cu ta un menasa grandi y real pa hopi isla.
