Despues cu Land Aruba a pidi pa wraak e hues den e caso di isla di Oro, cu Fundacion Parke Nacional a pidi pa stop e trabaonan cu e doño di e tereno a cuminsa haci, ayera 15 di april tres hues di HOF a bari for di mesa e argumento di Land Aruba y e caso lo sigui cu e mesun hues, mr. A.H.M van de Leur.
Diabierna 5 di april a trata na corte e caso unda a sali na cla cu e desaroyador no tabatin niun tipo di permiso pa e trabaonan na Isla di Oro, sino cu a pidi e permiso despues cu a haya e ordermaatregel. Ademas cu e desaroyador, den un entrevista na otro medio local, a señala cu nan kier a traha un beach, basha santo full ariba e rif, pone palapanan, mata di coco, y traha un area caminda turistanan por bishita e luga aki.
Abogado di Fundacion Parke Nacional Aruba (FPNA), Zuhaila Arendsz, den un articulo cu Bon Dia Aruba a publica dia 7 di april ultimo, a destaca cu conforme ley, e plannan ey ta contra e destinacion di e area, unda tin tres factor cu ta hunga un papel importante. Por ehemplo, ta un rif, ta un parke natural riba tera cu mangelnan y e otro parti rond di dje cu ta e area marino, locual ta nifica cu ta un area hopi importante cu mester haya proteccion; ademas ley ta indica cu den e area tampoco mag tin ningun funcion pa actividadnan turistico of actividadnan comercial.
Un otro motibo, manera Arendsz a informa, tambe tabata pa pidi hues pa Land Aruba no duna e parcela aki back den erfpacht, pa motibo cu e erfpacht di e parcela aki ta termina na 2026.
E caso dia 5 di april na corte a stop, debi cu abogado V.M Emerencia di Land Aruba a sinti cu hues A.H.M. van de Leur no ta imparcial y el a pidi pa wraak e hues loke ta nifica un “recusacion judicial” den idioma papiamento.
Segun e process verbal di e caso aki, cu Bon Dia Aruba ta dispone di dje e hues van de Leur referiendo na e parti cu Land Aruba a sigura cu nan no lo extende e parcela erfpacht na 2026, hues a declara cu “pa hopi biaha a experimenta y a mira cu Land Aruba ta tuma decisionnan contra ley.”
A base di e comentario aki, abogado Emerencia a señala cu “hues a mustra su parcialidad contra Land Aruba” y pa e motibo ey a pidi pa wraak e hues van de Leur.
Ayera 15 di april tres hues di HOF a bari for di mesa e argumento di Land Aruba y e caso lo sigui cu e mesun hues mr. A.H.M van de Leur.
Segun e documento di HOF di ayera di e cual Bon Dia Aruba ta dispone di dje, ta indica den evaluacion di e hechonan y circunstancia di Emerencia no ta duna motibo pa señala cu hues van de Leur no ta imparcial, e motibo ta cu e observacion di e hues ta di caracter general “si e pais y su organonan administrativo lo a respeta ley semper y den tur caminda, tur obhecion y recursonan den casonan administrativo semper lo ta declara infunda. Esaki ta un hecho conoci y esaki no ta e caso. Por lo tanto, den e comentario di e hues no ta aprecia ningun prehuicio den e caso aki.”
