, Aruba – 12 di november 2016: Un dia mundial di un enfermedad cronico ta un dia pa Plataforma Promocion di Salud para keto y refleha riba e impacto di diabetes riba nos salud. Plataforma Promocion di Salud ta un iniciativa di Minister di Salud Publico, Cuido di Nos Grandinan y Deporte.
E plataforma ta consisti di 7 organisacion cu ta traha y canalisa informacion di salud na e poblacion di Aruba y na dunado di cuido. E siguiente organisacionnan ta forma parti di Plataforma Promocion di Salud: Departamento di Salud Publico, SVb, Wit Gele Kruis, AZV, IMSan, dr. Horacio Oduber Hospital, IBiSA y un dokter di cas. Departamento di Salud Publico tin presidencia di e plataforma aki.
Plataforma Promocion di Salud ta pone atencion e aña aki na e tema di dia Mundial di Diabetes, esta “Wowo riba diabetes”, cu e enfoke pa promove screening regular. Di e forma aki por haya un diagnostico trempan di diabetes y su tratamento adecuado por tuma luga. Tur den cuadro pa preveni complicacion y su consecuencianan.
Alabes ta para keto na kico diabetes –no controla– ta haci cu e bista pasobra un persona cu diabetes por biba un periodo largo (lapso di 5-10 aña) sin sinti algun sintoma, te ora cu ta mucho laat. Den e caso aki un perdida di bista cu no ta reversibel. Cada miembro di e plataforma ta organisa actividad den e proximo dos siman pa asina contribui cu informacion y educacion pa nos poblacion bira mas consciente pa cu nan propio salud.
WGK a saca un serie di 9 foyeto relaciona cu diabetes. IBiSA via e Bus di Salud ta haci screening di salud den e proximo dos siman. Tur e barionan ta bay haya bishita di e Bus di Salud. Riba e Bus di Salud ta haci chekeo pa e factornan di riesgo cu ta contribui na diabetes y den e proximo dos siman control di presion di wowo lo tuma luga. Profesionalnan di Salud riba e Bus di Salud ta enfatisa riba un bon estilo di bida. Ta bon pa tene na cuenta cu un bon estilo di bida ta preveni cu un hende ta haya diabetes of ta contraresta pa haya complicacion. Pa cu bista tin cu controla e wowonan tur aña si bo tin diabetes, y siguramente tin cu check e presion di wowo.
Dialuna 14 di november Centro Diabetico na IMSan tin nan programa di conscientisacion cuminsando for di 9:00am pa 12:00pm cu un chekeo di salud y for di 4:00pm-9:00pm cu control di presion di wowo, charla relaciona cu e tema di e aña aki, demostracion di cushinamento, quiz di salud, kids corner y mas.
AZV ta provee dato di e cantidad di persona cu ta uza remedi pa diabetes, esta mas cu 8000. Tin calculacion cu un 4000 persona ta cana rond sin cu nan sa cu nan nivel di sucu ta halto.
Ta p’esey como Plataforma Promocion di Salud y nos como Departamento di Salud Publico ta encurasha pa haci un screening pa diabetes den e proximo dos simannan pa check pa e factornan di riesgo pa asina por tuma accion rapidamente pa evita complicacion como consecuencia di Diabetes. Tin cu keda cu bo bista fiha riba diabetes, manera e lema di e aña aki mes ta bisa “Wowo riba Diabetes”.
