Nos isla y nos economia ta depende grademente di loke ta pasando na otro parti di mundo; esey ta un realidad grandi cu no mester splicacion. Lamentablemente esey ta conta tambe pa e stuacion den cual nos ta actualmente. Cu preocupacion nos ta mira con e situacion na Merca ta ‘bira peor promer cu e mehora’ pa usa palabra di e propio presidente nobo. Situacion na Europa no ta mehora tampoco, mientras cu tambe na America Latino tin hopi pais, Brasil dilanti, cu ta den un crisis cu ta presenta peligro tambe pa otro pais.

Cu e consecuencia cu Aruba tambe a sinti e efecto di esey, cu e deseo di KLM pa Aruba cera frontera cu continente Latinoamericano, mientras KLM lo keda bula riba Aruba, loke ta otro interes importante pa nos. Aunke America Latino ta un region di menos importancia pa nos turismo, den tempo di crisis tur porta cu cera, ta un porta mas di cual pa basta tempo nos no lo por spera nada, es decir haciendo nos situacion mas dificil.

Di Merca tin mas problema na caminda, unda gobierno ta poniendo como condicion extra cu e biaheronan cu ta bolbe di exterior. lo mester presenta un test PCR, haci promer cu nan subi avion pa bolbe Merca. Esaki ta un extra gasto pa e turistanan, y ta crea preocupacion tambe si tin suficiente capacidad na Aruba pa atende e turistanan na un manera adecua ora nan salida ta yegando. Ta di spera cu por clarifica e situacion aki na tempo, pa e turistanan cu mester dicidi ainda si nan ta biaha si of no, mirando e gastonan mencion y falta di claridad segun nan, haya sa na tempo si tin solucion. Aki nos por ripara tambe con importante ta pa tin comunicacion fluido na tur momento cu nos clientela den exterior.

Un factor negativo importante den e crisis aki ta e cansancio y disgusto cu gobiernonan ta topa ora mester tuma medida pa detene e ola nobo di virus cu actualmente tin tanto pais den su gara. Na Merca a bin na mando otro partido cu por presenta un plan mas diligente cu e anterior, sin embargo e mentiranan di Donald Trump ainda tin hopi hende ta kere cu nada bon lo por sali di loke gobierno di Biden haci y por spera problema grandi ainda, si dicidi di tuma medida mas fuerte pa contene e virus, mientras Merca ta na caminda pa mitar miyon victima mortal caba. Na Hulanda, medida di toque de queda a conduci na violencia di hobennan cu no kier tende mas di limitacion di nan libertad di move. E disturbionan a topa cu protesta y rechazo fuerte di tur parti di comunidad Hulandes, per no ta kita cu tin duda kico lo por spera ainda den e proximo lunanan. Como agravante por considera e noticia di e tardanza den entrega di vacuna, cu lo bay causa cu e proyeccion vocifera pa gobierno Hulandes no lo por logra. Cu consecuencia cu pa nos tambe cu por lo pronto no por spera tanto di turismo di e continente ey.

Esakinan tur ta suceso na nivel internacional cu ta dificil pa nos controla. Tin otro asunto cu ta bin pa nos unda si ta spera y hasta ta requeri un contesta di nos banda. Esey ta por ehemplo e expresionnan di gobierno Hulandes cu awor ainda e islanan lo haya ayudo financiero, pero cu ta spera tambe cu e islanan mes lo mester bay haci algo pa purba soluciona nan situacion financiero y economico. Kico esaki ta significa pa nos? Cu nos mes mester percura pa, sea aumenta entrada, o corta gasto pa nos yega na un deficit mas aceptable pa nos pais. Y ta aki di biaha e problemanan ta surgi. Nos perspectivanan, hasta segun e scenario mas optimista, ta duna un recuperacion hopi parcial di economia y por lo tanto tambe di loke gobierno por spera e aña aki na entrada for di nos conhuntamente. Es decir, si no bin aumento abrupto den e sistema fiscal manera e ta awor. Esey ta haci cu sin duda algun lo mester bin algun austerisacion den e gastonan gubernamental. Esaki tambe lo tin efecto riba e poder di compra local, pasobra e austerisacion ey lo mester tuma lugar principalmente den e gastonan di personal y gasto cu ta cay bao di ‘Goederen & Diensten’ (Bienes & Servicio). Si austerisa den salario esaki ta reduci e cantidad di placa cu gobierno ta pone den circulacion a traves di pago di su empleadonan. Si corta gasto di bienes y servicio, e empresanan cu ta entrega esakinan na gobierno lo haya menos benta, y por lo tanto tin menos pa opera cune. Sin embargo, mester considera cu e efecto ta hopi menos dañino pa economia y tambe pa e ciudadano di poco recurso, cu un medida di aumento di impuesto. Y e situacion no ta birando mas facil pa gobierno, pasobra por ehemplo impuesto riba ganashi por mira un caida grandi e aña aki, pa e golpi cu empresanan en general a sufri na 2020. Speranza ta keda pa mehoracion mas den curso di aña, ora situacion na Merca y Europa mehora. Te e momento ey, cos por bira mas dificil promer cu e bay drecha.