Tur aña, riba prome di december, henter mundo ta conmemora e Dia mundial di AIDS cu ta “World AIDS Day”. Durante e dia aki, hendenan rond mundo ta uni pa mustra nan apoyo pa aproximadamente 38 miyon di persona , cu ta bibando y ta afecta cu HIV. Igualmente nos ta recorda esunnan cu a perde nan bida a consecuencia di e malesa di AIDS.
Na Aruba, Women’s Club of Aruba ta uni su mes na e mensahe mundial pa trece conscientisacion tocante e malesa aki, specialmente en conexion cu e pandemia di COVID-19.
Durante aña2020,e atencion di mundo ta enfoca riba e pandemia di COVID-19 y con el a afecta nos salud y nos economia. Un biaha mas, un pandemia ta mustra nos, con nos salud ta inter conecta cu e des igualdad nan social y economico existente den nos comunidad,e derechonan humano, e stigma y e discriminacion rond di cierto gruponan den nos comunidad.
Cu tur e temanan aki den mente , UNAIDS a proclama como tema pa aña 2020: “Solidaridad global, responsabilidad comparti” (Global solidarity, shared responsibility”).
COVID-19 a demostra, cu durante un pandemia, ningun hende ta “safe” te ora cu tur hende ta “safe”. Sigui bay dilanti lagando otro nan atras, no por ta un opcion,si nos kier ta exitoso como comunidad y como pais. Nos mester elimina stigma y discriminacion, poniendo nos hendenan na prome luga, pa asina nos por pone un fin na e pandemia nan cu ta canando man den man:esta HIV y COVID-19.
Den nos poblacion, tin personanan bibando cu HIV pa basta aña y tin di e personanan cu HIV cu tin tambe problema di curason of pulmon. E personanan aki ta den e categoria di risico halto pa contrae COVID-19.
Nos lo siña mas con e dos malesanan aki hunto por impacta personanan bibando cu HIV, ora otro paisnan ta comparti nan experiencianan.
Di otro banda, nos no por descuida e cuido di e pashentnan, e continuidad di e suplemento di nan remedinan y e medidanan di prevencion existente. Nos tin cu pensa aki nan riba por ehempel testnan di HIV,cu ta ser haci cu tur hende muhe na estado .
Mientras tanto, personanan bibando cu HIV mester ta cuidadoso y pone mas atencion na e medidadanan di prevencion.
E crisis cu nos ta bibando aden, ta un yamada di alerta, un “wake-up call”, un oportunidad pa haci cierto cambionan pa miho, door di traha hunto.
Ora nos automobilistanan ta pasa banda di CITGO Boulevard, e monumento di e strik cora di AIDS ta recorda nos e importancia di combati e pandemia aki efectivamente for di comienso.
HIV AIDS ta bay drenta den su 40 aña di existencia y nos contesta como comunidad riba COVID-19 lo ta crucial pa tambe yuda elimina HIV/AIDS como un menasa pa nos salud publico.
