Women’s Club Aruba a convoca un conferencia di prensa diahuebs pasa, pa informa henter comunidad di e celebracion di su 85 aniversario y den esaki nan a cuminsa organisa caba un bingo pa recauda fondo pa proyectonan pa comunidad.
Milagros Posner, Presidente, a indica cu esaki lo tuma luga dia 26 di october proximo na Club Caquetio. E porta ta habri desde 5or y e bingo lo cuminsa for di 7or. E meta ta pa recauda fondo pa duna bek den comunidad. Ademas di esey el a anuncia cu e dia ey nan lo tin ‘doorprizes’ hunto cu un rifa pa e comunidad asistiendo lo por gana diferente premio.
Women’s Club Aruba tin diferente proyecto pa comunidad cu tur aña nan ta haci. Na e momentonan aki nan ta bezig cu e proyecto di medio ambiente na scol. Den esaki 150 mucha hunto cu nan juffrouw, miembronan di e club y personal di Santa Rosa lo bay planta algun mata, pa asina trece den muchanan e conscientisacion di por planta, pa di e manera aki nan por come loke nan ta planta.
Tambe el a expresa cu nan lo cuminsa cu e temporada di bisti e muchanan. Tur aña nan ta bisti casi 175 mucha pa e tempo di Pasco, yudando asina e famianan na Aruba pa e muchanan por pasa nan Pasco mas contento hunto cu nan famia.
Di mesun manera, Posner a informa cu otro di e proyectonan ta ‘Student Award’ pa horna e miho graduadonan di scolnan secundario na Aruba y ademas e proyecto di conscientisacion di hende muhe, cu a tuma luga e luna di juni.
Posner a manifesta cu nan lo ta zorg pa sigui cu e proyectonan aki pa por duna mas pa e comunidad. Personanan cu tin interes di participa na e bingo di e proximo 26 di october por tuma contacto cu nan riba Facebook di Women’s Club Aruba.
