Wit Gele Kruis y POH ta organisa evento di salud pa comunidad

Durante un conferencia di prensa ayera mainta director di Wit Gele Kruis, Gino Goeloe, hunto cu coordinador Praktijk Ondersteuners Huisartsenzorg (POH), Jasmira Mora, a anuncia un evento di chekeo di salud gratis pa comunidad di Aruba en conexion cu celebracion di dia internacional di praktijk ondersteuners y tambe e celebracion di 10 aña di existencia di POH Aruba.

Dia 22 di mei praktijk ondersteuners ta celebra nan internacionalmente y oficialmente na juli POH Aruba cumpli 10 aña di existencia y en conexion cu e dos celebracionnan aki, diasabra 21 di mei lo tin un evento di chekeo di salud gratis pa henter pueblo di Aruba na Club Kibrahacha.

Goeloe a splica cu POH a cuminsa na aña 2012 cu deliberacion entre HAVA, AZV y Wit Gele Kruis na unda a ripara cu e pashentnan mester di mas tempo na e dokternan di cas. El a sigui splica cu nan a ripara cu e dokternan di cas ta hopi yen y no tin e tempo ni manera pa guia e pashentnan cronico cu diabetes y esnan cu ta sufri di presion halto.

Desde 2016 pa 2017 e proyecto di POH a bira un realidad na unda Breedeorde Hogeschool di Hulanda cu a bin cu opleiding pa e nursenan cu riba nivel HBO a haci un opleiding specialisa den diabetes y malesanan cardiovascular.

“Esey ta algo mi ta kere ta grandi pa Aruba pasobra den Caribe no tin POH, no tin na Boneiro, no tin na Corsou, no tin na Sint Maarten, den Caribe no tin POH. Aruba tabata e prome cu a bin cu e idea aki, cu ta algo cu tabatin basta tempo caba na Hulanda. Nos a wak kico Hulanda tabata haci, pero nos a cambi’e un tiki na e modelo pa Aruba”, Goeloe a indica.

Awendia un POH ta dedica mei ora pa un ora pa cada pashent, pasobra, segun Goeloe a señala, esey ta algo cu nan semper a ripara, cu na un dokter di cas un pashent tin solamente algun pa wordo atendi y hopi biaha no tin follow up. Cu ayudo di e POH si tin follow up y nan ta sigura pa e pashent presenta back pa e su siguiente consulta pa check e sucu, presion, colesterol, tur cos y nan ta guia e pashent tambe.

Manera ta conoci caba na Aruba tin un problema cu enfermedad di sucu y presion halto entre e ciudadanonan y esaki ta algo cu ta asina pa basta aña caba. Goeloe a indica cu e POH ta lucha cu esaki cu nan pashentnan. Tin biaha pashentnan tin pashentnan cu ta motiva y tin pashentnan cu no ta motiva, pero e trabou di e POH ta pa apoya y yuda e pashentnan biba e malesanan aki.

El a remarca cu antes na cada dokter di cas tabatin un POH, pero aworaki esaki no ta e caso mas pasobra pa motibo di e pandemia, e opleiding pa POH no a sigui. Pero den futuro e plan ta pa tur dokter di cas haya un POH na nan consultorio.

“Tin dokternan di cas cu no tin POH y nan ta bira manera loco pasobra nan kier nan POH pa guia nan pashentnan. Tin dokternan cu tin un cantidad grandi di pashentnan grandi y tin mester di e ayudo y guia di e POH pa nan pashentnan”, Goeloe a subraya.

El a splica cu unabes diabetes complica, e pashent por haya complicacion cu wowo, cu riñon, cu circulacion na pianan entre otro y esey ta casonan cu e organisacion ta purba di evita. Goeloe a señala cu e Clinica di dialyse ta yenando. Actualmente tin 200 pashent na Aruba cu ta ricibi dialyse y cada pashent ta costa 100 mil florin pa aña, cu ta un 20 miyon florin pa aña. “Si por baha e gastonan aki, ta cos di aplaudi y p’esey e POH t’ey, pa guia e pashentnan pa no haya complicacion”.

Jasmira Mora, coordinador di POH na Aruba a splica tambe cu e POH ta atende cu pashentnan cu ta diabetico y tin problemanan cardiovascular. E POH ta tuma bastante tempo pa cada pashent pa asina purba di saca afo kico ta e problema ta y pakico e pashent a yega asina leu cu e tin un problema di sucu, un problema di presion of tur dos.

“Esaki ta rekeri tempo, e no ta djis cu bo ta yega duna e pashent un pildo y lag’e bay cas pa e cura di e sucu of di e presion. Esaki ta un consulta hopi mas extenso na unda e pashent mester yega na confia su POH pa splik’e tambe kico tur realmente ta pasa na cas. Nos ta purba di saca afo kico ta e motibo di e problema y asina por tin un miho strategia pa yuda e pashent tin control di nan sucu y nan presion halto”, el a enfatisa.

Mora a destaca tambe cu como POH nan no ta para keto pasobra den e sector di medicina semper ta keda avansa y sikiera un biaha pa luna, sigur seis biaha pa aña, POH ta sigui lesnan clinico. Tambe tin dokternan ta bin di afo pa papia di e diferente tipo di remedinan cu tin pasobra, aworaki tin hopi remedi y pa POH ta hopi importante pa sa kico por ofrece na e pasietnan y asina sigura cu tur locual nan ta ofrece ta completamente up to date.

Por ultimo Mora a extende un invitacion pa pueblo di Aruba pa asisti na Club Kibrahaha diasabra dia 21 di mei pa asina nan por haci nan chekeo di sucu, presion, peso y tambe circunferencia di bariga. Tambe lo duna informacion ariba diabetes, nutricion, movecion y hopi mas.

El a enfatisa cu e evento aki no ta solamente pa hende grandi, 60+, pero pa tur edad, hoben y adulto. El a haci un yamada special pa hobennan pasa haci nan chekeo gratis y alabes a subraya e importancia pa e grupo di poblacion aki haci nan chekeo sikiera 2 biaha pa aña ya cu hopi biaha hobennan por sufri di diabetes of presion halto sin ta na altura di esaki door cu nan no ta haci nan chekeo di salud manera debe ser.