Wit Gele Kruis tocante Dia Internacional di Diabetes: Te 2019, 8.11 porciento di e poblacion tabata usa remedi pa diabetes

Wit Gele Kruis ayera mainta den medionan di comunicacion local a informa cu dia 14 di november ta Dia Internacional di Diabetes. Pa e motibo aki, nan tin organisa un actividad na nan sede di San Nicolas y Paradera, pa conscientisa hende tocante haci chekeo nan sucu y colesterol.

Gino Goeloe, director di Wit Gele Kruis, a bisa cu semper nan ta wak prevencion como algo cu ta hopi importante pa comunidad y p’esey desde 2007 nan a cuminsa cu programanan educacional na TV, unda cu nan a pone cu hendenan na Aruba mester move mas, come saludabel y mantene un peso saludabel.

Goeloe a menciona cu awendia nan ta mirando cu Aruba su ‘grado di peso’ ta hopi halto. El a afirma cu tin un 80 porciento di e comunidad cu tin sobrepeso of ta obeso; y diabetes ta un malesa cronico. “Nos comunidad mester compronde cu estilo di bida ta un parti cu [por ocasiona cu] bo ta haya diabetes”.

Personanan cu tin sobrepeso of cu ta obeso tin mas chens di haya sucu, y e parti mas grandi cu nan ta wak ta esaki. Igualmente el a comunica cu Fundacion Diabetico Arubano, cu tambe ta enfoca riba e parti cu nan como enfermero ta esun cu ta educa e pashent. Aki nan ta aplica e parti di Praktijkondersteuners na unda Wit Gele Kruis a bin cu nan desde 2012 manera un proyecto piloto cu AZV y cu na 2014 el a bira algo integral di Aruba na algun dokter di cas.

Ta p’esey cu pa 2021 tin pensa di pone mas praktijkondersteuners na tur oficina di dokter di cas pa guia e pashentnan.

Goeloe a indica cu nan a haya cifranan for di AZV na unda nan ta wak cu na 2017 tabatin un cifra di 8.2% di aseguradonan cu a haci uso di remedi pa diabetes, loke tabata calcula e suma di 4.4 miyon florin pa aña ey. Na 2019 e cifra a aumenta na 8.11%.

Di mesun manera, Goeloe a bisa cu tin aproximadamente 200 pashent cu ta dialisa, cu ta costa aproximadamente 100.000 florin pa aña, den total ta casi 20 miyon florin pa tur pashent.

E aña aki nan ta pone hopi enfasis riba e enfermero, pa motibo cu si nan no tin hermentnan pa por yega na e pashent, e ora ey tur informacion cu nan ta duna pa comunidad ta keda en vano. P’esey e aña aki nan ta organisando actividadnan pa check sucu y colesterol na Wit Gele Kruis di San Nicolas y Paradera, mañan diasabra 14 di november.

Igualmente nan a señala cu door di Covid-19 hopi hende no ta bayendo dokter pa miedo di haya e malesa aki. Y pa e motibo ey nan ta organisa e chekeo gratis. “Tin biaha cu malesa di sucu y malesa di colesterol no ta duna sintoma”, el a menciona.