Wit Gele Kruis: ‘25% di mucha entre 3 luna pa 1 aña tin sobrepeso’

Wit Gele Kruis lo ta colaborando cu Investigacion riba sobrepreso y obesidad pa baby entre 0 pa 24 luna na Aruba, conhuntamente cu dokter di mucha neonatologo Anne-Mieke Oudshoorn y tres studiante di Groningen.

Linda Croes, coordinador di departamento di Ouderkindzorg Consultative Bureau a menciona cu ta contento cu investigacion cu Oudshoorn lo ta bezig cune. E ta sigur cu un investigacion asina lo ta beneficioso pa muchanan di Aruba.

Nan a sinta cu e team di Consultatie Bureau conhuntamente cu 3 studiante di Groningen pa wak con por haci e investigacion ‘mas efectivo’, pero tambe pa mayornan keda bishita ,mirando cu ta un cooperacion cu mayornan.

Croes ta duna di conoce cu consultorio ta bon atendi pa mayornan cu tin mucha chikito. E consultorio ta un servicio cu With Gele Kruis ta duna pa asina wak cuanto e mucha ta pisa of midi, pa wak con e alimentacion ta, ‘nos ta pone atencion na comemento’.

E ta bisa cu cada biaha cu mayornan bin cerca nan, e ta un topico cu semper ta papia riba dje y nan departamento semper ta keda puntra. E ta bisa cu e cifranan cu ta drenta ta alarmante, unda cu ya caba por mira 25% di e muchanan di 3 luna pa 1 aña tin sobrepeso. Pa nan e ta alarmante, mirando con na un edad asina trempan por papia di sobrepeso.

E prome pregunta cu nan ta puntra tur mayor ora nan bin Wit Gele Kruis ta e parti nutritivo. Pa cada mucha cu bin cu nan mayor, nan ta duna conseho na e mayornan riba kico mester duna di cuminda, cantidad y guia tocante e peso di mucha.

Conhuntamente cu e mayor nan ta guia y sostene un desaroyo saludabel. Pero den investigacion a haci den pasado, e ta bisa cu otro persona rond di e mayornan, manera famia extendi (welonan, tantanan) tambe ta duna e mayornan conseho y guia, y ya cu ta trata di famia, e mayornan ta prefera di tuma esey ‘en bes di conseho di Wit Gele Kruis’.

Oudshoorn ta trahando pa 10 aña na Aruba y ta mira e problema cu adulto y mucha cu tin sobrepeso of obesidad ta sufri. Tin investigacion internacional cu ta mustra cu e problemanan desaroya na un edad mas grandi ta cuminsa ora ta mucha, pues den ‘e prome periodo di nan bida’.

E ta splica cu for di momento cu e mucha ta den bariga di e mama te cu e mucha haci 1 aña ta un periodo importante. “E prome 6 luna ta determina e manera cu e mucha lo sufri di sobrepreso.”

Nan lo kier wak cua ta e puntonan cu tin pa asina despues nan por preveni e muchanan di bira gordo. Mucho programa awendia ta bay di mucha cu ta obeso of tin sobrepeso y pa nan perde e peso y ta mas saludable ora nan bira adulto.

Sinembargo e ta bisa cu lo ta miho pa preveni prome cu e mucha yega na 12 aña di edad pasobra na e momento ey ya ta laat.

Oudshoorn a bisa cu e tres studiante di Groningen lo ta pa 2 luna haciendo pregunta pa muchanan di 0 te cu 12 luna cu ta acerca e consultatie bureau pa mayornan. E ta bisa cu e pregunta ta largo pa esunnan cu ta bay participa den investigacion.

Pregunta manera cuanto cuminda ta duna e baby, yoramento di mucha, con e ta reacciona riba cuminda, ‘nos lo puntra hopi pregunta’. Ora nan tin tur e pregunta y contesta, nan lo reuni tur esaki. Pregunta manera cuanto berdura of fruta e mucha ta come. Cuminda tambe manera pasta, funchi pero ta control normal.

Nan lo siña dicon e mucha tin sobrepeso y kico nan lo kier drecha. E ta enfatisa cu tur e informacion cu lo obtene lo ta anonimo y no lo haya e nomber di e mucha of e data cu nan tin. Tambe ta importante pa bisa cu ta importante pa mayor duna permiso.

Den investigacion di CBS tabatin mucha di 3 luna bay ariba cu 25 – 30 % sobrespeso y 10% obesidad. Esey ta te cu 5 aña. Pa muchanan den nan 12 aña di edad, e ta bisa cu ta 50% di obesidad.

Nan lo kier pa hopi mayor acerca e consultative bureau, conhuntamente cu e studiante di medicina nan lo tin dos colega na Hulanda cu lo ta haciendo e investigacion y ta colecta e data. Nan lo compara di nan investigacion na Hulanda y esun na Aruba y wak e diferencia aki.

E preguntanan lo ta den tur cuatro idioma pa ta facil mirando cu tin diferente famia cu no por domina tur idioma. Tambe ta remarca cu lo tin colega di Wit Gele Kruis pa cualkier ayudo cu e studiante lo tin mester.