(CuraçaoChronicle) – Winward Islands Airways International WINAIR na october ultimo a cuminsa paga back e $3 miyon si prestamo cu a obtene for di gobierno Hulandes na comienso di pandemia di Covid-19.
Minister Hulandes di Infrastructura y Maneho di Awa, Mark Harbers a declara esaki den un carta di update di aviacion cual a manda na Tweede Kamer di Parlamento Hulandes. E carta ta contene algun paragraf riba Hulanda Caribense y conectividad entre e islanan.
E minister a confirma cu WINAIR na october 2022 a cuminsa paga back e prestamo den 15 luna, incluyendo e interest di 4.41% pa aña. “Esaki ta nifica cu e prestamo ta bay keda paga back dentro di e termino acorda”, Harbers a declara.
Dia 31 di december 2020, predecesor di Harbers, Cora van Nieuwhuizen Wijbenga, a informa Tweede Kamer cu gobierno Hulandes a dicidi di responde positivamente na un solicitud di prome minister di Sint Maarten, Silveria Jacobs pa duna WINAIR e prestamo hopi necesario.
Den e parti inicial di e pandemia, WINAIR a cay den problemanan financiero pasobra no tabatin casi ningun entrada pa motibo di paro di trafico aereo, mientras e gastonan fiho di e compania a continua en gran parti. WINAIR ta e unico aerolinea cu tin conexion cu tur seis isla di Caribe Hulandes y ta mantene e schedule di vuelo regular na Saba y Sint Eustatius for di Sint Maarten.
Pasobra e conectividad inter-insular tabata den riesgo, gobierno Hulandes a dicidi pa otorga un prestamo di $3 miyon di hipoteca riba e edificio di e aerolinea na aeropuerto na Sint Maarten, y cu un termino di pago di 18 luna. E condicion mas importante tabata cu WINAIR mester a haci al menos dos vuelo diario entre Sint Maarten, Sint Eustatius y Saba durante e periodo aki.
Gobierno Hulandes ta doño di 7.95% di accion den WINAIR. E otro 92.05% ta propiedad di gobierno di Sint Maarten. Gobierno Hulandes a cumpra e accionnan na 2010 pa salvaguardia conectividad na Saba y Sint Eustatius.
Na december 2021, a keda anuncia cu propiedad di gobierno no tabata e “instrumento mas adecua” pa salvaguardia e interes aki. “Ta p’esey cu a indica cu ta bay deshaci di e accionnan di WINAIR asina cu por lansa un instrumento alternativo. Esaki ta nifica cu e enfoke di gobierno como accionista a cambia na tres prioridad”, Harbers a bisa.
E prome prioridad ta pa salvaguardia accesibilidad di Saba y Sint Eustatius lo miho posible te cu por haya un instrumento alternativo cu por haci esaki mihor. Puntonan di atencion special ta prijs pa pasashi, conexion regular y continuidad.
E segundo prioridad ta cu WINAIR ta paga back e prestamo otorga durante e pandemia na tempo. E tercer prioridad ta pone e compania cla pa un transferencia ‘ordena’ di accionnan, segun e minister.
Na december 2021, gobierno Hulandes a priminti Tweede Kamer cu ta bay evalua e posibilidadnan di un Public Service Obligation (PSO) como instrumento alternativo pa participacion di gobierno den WINAIR pa asina garantisa e accesibilidad di Hulanda Caribense.
Evaluacion di PSO mester tabata cla pa fin di 2022, pero e ehercicio aki no a keda completa ainda, segun Harbers. El a splica cu su ministerio tabata preparando un cambio den Ley di Aviacion di Hulanda Caribense cu lo mester “ofrece un fundacion pa establece un PSO riba rutanan mal sirbi pa y for di Hulanda Caribense.”
Segun e minister, mehoracion di acceso pa Saba y Sint Eustatius ta di “vital importancia” pa e desaroyo socioeconomico di e islanan aki. El a anuncia cu e propuesta di adaptacion na e ley mester keda manda na Tweede Kamer den ultimo kwartaal di 2023.
Harbers a nota cu pa establece PSO tin mester di financiamento. Ta bay explora e posibilidadnan den e proximo periodo y ta bay informa Parlamento den segundo mita di 2023 tocante e resultadonan di e opcionnan financiero aki.
