Wilyenie Croes ta un hoben adulto cu ta dedica na e deporte di bodybuilding riba nivel competitivo, ta un studiante na Universidad di Aruba y ta mama. E ta conta Bon Dia Aruba con e ta combina tur e diferente bachinan aki pa logra su metanan, tanto personal como deportivo.

Na 2013 el a cuminsa traha na un gym como balie medewerkster y e mundo di fitness y bodybuilding a yama su atencion instantaneamente y asina el a cuminsa train. E mesun aña ey e tabatin deseo pa competi, pero no a logra keda cla pa subi stage.

Croes a sigui conta cu na 2015 el a logra competi na Hulanda y despues di esey el a stop di practica e deporte. Na 2017 el a haya yiu y p’e, el a remarca, bolbe practica e deporte a bira algo cu nunca mas lo pasa. Pero ora el a bin biba back na Aruba den 2020, el bay wak show di bodybuilding atrobe y asina e pasion a lanta back.

“E mesun aña ey na augustus mi a cuminsa prepara pa competi na januari 2021, despues di shete aña sin competi, y di eynan mi a competi tur aña te cu e aña aki tambe,”, el a indica.

Wilyenie a splica cu durante e periodo cu el a stop di participa den e deporte di bodybuilding nunca el a stop di train, el a cambia su manera di train, pero nunca no a stop di ta activo den fitness.

“Mi a bay di siete biaha pa siman, tin biaha dos biaha pa dia, pa tres biaha pa siman so pasobra mi tabatin mi yiu chikito y ora mi tabata por mi tabata train. Tin siman mi no tabata train mes, pero bo tin cu djis purba haci loke por, si ta tres biaha pa siman, ta tres biaha pa siman so,” el a indica.

El a sigui conta cu ora el a bin back Aruba el a tuma e decision di dedica mas tempo na su hobby di deporte, pasobra na Aruba su e tin famia cu por yudele. Su mama tabata yudele hopi y tabata wak pa su yiu si mester pa e por bay gym. Asina, cu ayudo y apoyo di su famia, e por a logra su meta di train siete biaha pa siman plus cardio.

Wilyenie ta studiando na Universidad di Aruba y ta den su di tres aña den su estudio di Social Work and Development y ademas, e tin su yiu tambe. El a conta con e ta balansa tur esaki pa cumpli cu tur meta y debernan.

E ta conta cu e ta involucra su yiu den actividadnan fisico y den su rutina door di train hunto. Ora cu su yiu ta train coremento cu su team, e ta train cune. Of ora cu su yiu tin landamento, si e por e ta bay cune. Su yiu ta bay gym cune tin biaha tambe y e ora su yiu sa cu esey ta e ora cu mama haci su sport.

“E tambe tin su sport, dus e ta compronde esey. Como mayor bo ta ehempel di bo yiu. Mi yiu tur ora ta bisa mi ‘mama bo no mag di come donut no?’, mi ta bis’e no. Despues e ta puntra mi si e mag di come donut y mi ta bis’e si, pero e ta bisa mi cu donut no ta bon pa bo. E ta birando consciente cu e por come cos dushi, pero no di mas of si e come hopi cos dushi e ora e por sport. Mi no kier pa e bira algo negativo p’e pasobra e ta mucha ainda, pero si mi kier pa e ta un tiki mas consciente cu e tin cu move y purba di ta consciente di loke e ta come,” el a enfatisa.

Por ultimo, Wilyenie ta duna su mensahe na tur esnan cu kier cuminsa haci mas actividad fisico of cu kier drenta den e mundo di fitness: “Djis cuminsa. Si ta djis cana 30 minuut pafo riba Linear Park of den mondi, si ta cana, si ta landa, algo, 30 minuut un biaha pa siman ta ok y asina bo ta cuminsa hacie mas y mas. Ora bo cuminsa wak cambio, e ora bo ta bay dedica bo mes na algo. Si bo cuminsa un biaha pa siman y bo a gusta, por ta e ta bira dos, e por bira tres y asina bo ta wak cambio, e ta bira un ora cinco biaha pa siman. Dus tiki tiki, pero djis cuminsa.”