Sindicatonan Apri y PWFC antayera a entrega varios exigencia di parti di personal di Isla na gobierno di Corsou: pa kita e beslag cu Refineria di Korsou (RdK) a haci riba e placa di Aqualectra destina pa Isla y pa preveni cu RdK tuma un beslag similar den futuro.
Den e demanda ta indica cu e trahadonan di Isla no lo bay traha te cu cumpli cu nan exigencianan. Asina presidente di Apri Gherrel Remilia a declara na Antilliaans Dagblad. E personal a bandona trabou antayera caba y ayera a reuni na sede di PWFC sperando gobierno su reaccion. E lidernan di e sindicatonan, banda di Remilia, Angelo Meyer di parti di PWFC, ayera a wordo ricibi pa Ministernan Quincy Girigorie di Husticia y Giselle Mc William di Desaroyo Economico. Girigorie a tuma over den ausencia di prome minister Rhuggenaath.
Loke a sigui ta deliberacionnan di oranan largo entre gobierno y representantenan di Aqualectra, RdK y Isla, unda a studia e opcionnan cu tin riba mesa. Segun e sindicatonan – y esaki Isla tambe a declara den un aviso grandi den corant riba diaranson – e refineria ta perhudica pa e beslag aki y na su turno tambe e pagonan na e personal. “P’esey nos kier pa gobierno lanta e beslag. E ta un condicion cu e personal mes a pone”, Remilia a indica.
Sinembargo, segun Director interino di RdK Marcelino ‘Chonky’ De Lannoy, refineria Isla no ta bay completamente plat pa via di e beslag. E ta señala na cuentanan cu Isla tin na Girobank, unda segun e director interino tin suficiente placa pa paga salario. “Kier men si Isla no paga salario fin di luna, no lo nifica nada, pasobra e medionan financiero t’ey pa paga”, De Lannoy a declara.
