Clinica Salu pa Tur desde su apertura den cuminsamento di juli a brinda ayudo medico na mil Venezolanonan cu normalmente no ta haya ayudo medico. Asina e fundacion a skirbi riba nan website.
Stichting Vluchteling ta duna apoyo financiero na e iniciativa di dokter (basisarts) Hulandes Elisa Janszen. Nacionnan Uni, por medio di United Nations High Commissioner for Refugees (UNHCR) tambe ta apoya e iniciativa aki. Esaki ta e unico clinica, riba Corsou, pero tambe den henter parti Caribense di Reino te awo. Janszen ta e unico dokter trahando na e clinica actualmente. Danki na ayudo di boluntarionan e clinica ta draai, pero sigur tambe cu apoyo di specialistanan medico cu ta pone nan mes na disposicion di duna conseho den casonan urgente.
Di e articulo por mira cu peticionario di asilo cu malesanan cronico manera diabetes pero tambe HIV a haya nan caminda pa e clinica. Ora ta necesario e pashentnan ta wordo manda na un psicologo of ta wordo referi na hospital. Stichting Vluchteling ta conta Janszen cu hopi peticionario di asilo tin miedo di bay hospital pa atencion adicional, pasobra nan tin miedo di cay den man di polis of migracion. Tin tambe hende muhe cu a pasa den abuso cu tambe ta hay’e dificil pa entrega un keho na polis.
E retonan cu e Venezolanonan ta enfrenta ta amplio, incluyendo e echo cu tiki biaha nan sa tin suficiente medionan pa paga cualkier ayudo. Janszen a splica cu “Pasobra nan no tin hopi placa, e tratamento tin biaha ta bira dificil, pasobra un pashent cu malesanan cronico manera diabetes mester tin suficiente placa pa paga pa un meter di sucu of pa haci un test”. Ademas, Janszen a indica, “Control regular ta bira necesario, pero fastioso pasobra Venezolanonan no tin placa of tampoco transporte pa yega e clinica”.
