Refineria Isla, cual ta cay bou compania petrolero Venezolano PDVSA, no solamente a laga di cumpli cu pagamento di e ‘take or pay fee’ pa compania estatal Curaçao Refinery Utilities (CRU) – un suma di 75 miyon Florin – awo tambe ta bin na cla cu tin añanan sin paga e cuenta di awa potabel, cual ta yega na mita miyon pa luna.
Tin un cuenta habri di 17 miyon Florin cu debe na Aqualectra pa produci y suministra awa. Esaki ta coresponde cu uzo di awa pa mas o menos 2 aña y mey di uzo. E punto ta cu e meter di awa di Aqualectra ta riba nomber di Utilities di Corsou (Curaçao Utilities Company, CUC) y segun director interino Marcelino de Lannoy di Refineria di Korsou (RdK) esaki ta un ‘compania bashi’. Pa e rason aki CUC tin casi 8 miyon di Florin cu e ta debe na e productor di awa.
Segun De Lannoy, e echo cu CRU ta entrega recibonan ta comprendibel. “Pero RdK y/of CRU no ta CUC. Esey ta e rason dicon e beslag conservatorio no a logra”. E conexion riba e tereno di e refineria ta opera completamente pa Isla, pues Isla ta dicidi si e cranchi di Aqualectra ta keda habri of ta cera. Mientrastanto Isla su gastonan ta saliendo for di man y ta nenga di haci algo tocante e situacion, entre otro pa via di e promesa cu lo bay cambia e planta, pa asina Isla por haya awa potabel mas barata.
