Minister di Enseñansa Marilyn Alcalá-Wallé (PAR) a entrega un keho na OM contra parlamentario Charles Cooper (MFK). Esaki ta e mandatario su reaccion riba e entregamento di keho cerca Ministerio Publico di parti di Cooper.
E mandatario ta acusa e parlamentario y otro miembronan di fraccion di MFK di difamacion. Alabes Alcalá-Wallé ta mustra riba e expresionnan di Procurador General Roger Bos, unda ta bisa cu parlamentarionan y ministernan mester bay enfoca riba debati mas pa busca un solucion na cualkier problema en bes di bay cana caminda disciplinario. E minister ta menciona cu pa e rason aki e lo bay pidi un reunion cerca presidente di Parlamento pa ‘trata e topico aki paden di Parlamento’.
MFK, por medio di Cooper, a acusa e minister di procede ilegalmente, contra e ley di integridad riba (candidato-) ministernan por medio di tin otro funcion apart di su funcion como minister. E mandatario te poco tempo pasa tabata aparece riba e registronan di Camara di Comercio como director di e NV ‘Alcalá CQI Medische Praktijk’ y tambe di su fundacion Marilyn Alcalá-Wallé Foundation.
Di otro banda di medaya e minister ta mustra den su keho riba e diferente acusacionnan cu ta andando contra e parlamentario. Entre otro ta menciona cu a duna un tereno na Caracasbaai na un ‘inversionista grandi’, banda di otro ‘otorgamento di tereno dubioso’ na Knip y Playa Abou cu no a cana e caminda corecto, pa cual rason e no tabata ministeriabel den 2010.
Segun e minister encarga cu enseñansa, MFK y su miembronan di partido ta simplemente interesa den mira gobierno cay. Esaki Alcalá-Wallé ta haya lamentabel, specialmente ora e minister ta ocupa cu un tarea importante di negosha cu departamento di enseñansa Hulandes DUO ‘pa asina resolve e problemanan cu ex studiante tin pa paga nan debe bek’.
