Recientemente e Presidente Director Interino na Banco Central a bisa cu lo inicia un investigacion si na Giro tabatin trato preferencial durante un periodo di restrikshon impone pa Banco Central. Segun un tratamento den corte civil, entre 27 di november pa 10 di december, cierto clientenan na Giro a baha miyones for di nan cuentanan, cual consecuentemente por a stimula e “cash run”.
E informacion a bin sali dilanti despues cu abogado di Banco Central a confirma den corte civil cu Giro a duna preferencia na algun cliente pa logra baha nan cen for di nan cuentanan. Ta trata di e.o. un caso cu SOAB a entama contra di Giro y Banco Central. SOAB, probablemente despues di a tende rumornan di un “cashrun” na Giro, a ordena e banco pa translada 2 miyon di su deposito na Giro pa un cuenta na MCB. E cen nunca mas no a bini y riba 3 di december, SOAB a manda puntra pa e cen. Den un contesta di Giro, SOAB ta conclui cu tabata debi na restriccion impone pa Banco Central, Giro no tabata por a manda 2 miyon riba e cuenta di SOAB na MCB.
Giro a splica SOAB cu tabata for di 27 di november, cu nan keda restringi pa Banco Central, cual restriccion riba 10 di december a resulta den un moratorio pa tur tenedo di cuenta na e Banco den Skalo. Segun abogado di SOAB, Lizanne Asjes, durante mesun periodo di nan peticion riba pago, otro tenedo di cuenta na Giro si a logra haya nan placa. Esaki ta contra di e principio di igualdad “creditorio” durante medidanan emergente. Ayera Jose Jardim di Banco Central a confirma cu lo bay tin un investigacion ta ken ta lesnan responsabel cu a duna preferencia pa Giro paga cierto clientenan mientras Banco Central a impone un restriccion.
