Autoridad a detene hoben di 17 cual a admiti di tin conexion cu prome asesinato di aña cu a tuma luga diadomingo dilanti di e centro di diberticion riba Rooseveltweg.
Dialuna e team investigacion a realisa dos deteccion cu ta relaciona cu e prome caso di asesinato di aña. Pa mas o menos 4or di atardi e team di recherche hunto cu polis a bay na un completo di apartamento situa na Basorapretuweg. Autoridad a haya un tip cu e sospechoso cu a los e tironan cu resultado fatal pa e victima Richentley Bernardus di 23 aña di edad mester ta kedando eynan.
Ora cu autoridadnan a drenta e luga nan a topa cu un hende homber cu tabata keha di basta dolor. E homber a ser identifica como E.E.P.C di 17 aña naci na Republica Dominicana.
Aki ta unda cu e sospechoso a admiti cu e tabata envolvi den e caso di asesinato y tambe a splica cu durante di e bringamento prome cu el a los e tironan el a wordo maltrata na unda el a sufri lesion y tambe fractura na su brasa. Segun e sospechoso e victima hunto cu algun homber mas kier a kita su holoshi Rolex for di dje pa cual el a defende su mes.
A pidi asistencia di ambulance y transporta e sospechoso pa CMC pa asina e por a haya asistencia medico avansa. Despues di e haya asistencia medico e sospechoso a keda detene y a wordo presenta dilanti un Fiscal Auxilia cu a ordena su encancelacion. Seguidamente a cuminsa un buskeda pa e dama Nicole Lake di 20 aña di edad cu tambe tabata hunto cu e sospechoso na e sitio di asesinato,cu despues di e caso di asesinato a drenta den un auto blanco hunto cu e sospechoso y a bandona e sitio.
E buskeda no a dura mucho y autoridadnan a logra detene e dama den Heersstraat cu tabata den un vehiculo blanco. E dama a ser deteni como complice den e caso di asesinato.
