Recientemente un grupo di detenidonan Venezolano tabatin un accion den prizon SDKK. E situacion di trabou ta uno peligroso na e Sentro di Detenshon y Korekshon (SDKK), pa motibo di e presonan peligroso aki.

E sindicato ABVO cu tin mayoria representacion di trahado na prizon, ta bati e alarma aki. Detenido peligroso y tambe e falta di personal, segun ABVO ta entre otro motibonan di peliger na e instituto di coreccion. Minister di Husticia Quincy Girigorie, ta rechasa e opinion di ABVO cu bida di personal di prizon na ta na peliger.

Recientemente detenido Venezolano, a ataca preso yiu di Corsou. Durante di e acto, e Venezolanonan a stroba e warda presonan pa interveni. Nan a purba yega na e cel di e yiunan di Corsou, uzando obheto pisa pa kibra e porta y pa subi bay ariba pa agredi e dos presonan. Ora cu esey no a logra e Venezolanonan a cende corchon na candela, den un intento pa kima e presonan, mientras cu nan tabata tira obheto den e celnan.

Na dado momento un di e detenidonan Venezolano a manda un obheto hopi skerpi cu nan mes a traha, mara na un palo di basora, riba un di e wardadonan di preso.
Despues cu e personal a subi riba dak pa purba calma e situacion, tabata necesario pa lansa un tiro di advertencia dirigi cu a alcansa un di e detenidonan na su pia, pa cua e mester a ricibi tratamento medico.

Kenneth Bremer, di directiva di ABVO ta insisti cu a bira tempo pa gobierno tuma e medidanan necesario na prizon. ABVO ta representá 84% di e personal na prizon. For di 2014 sindicato a indica cu tin falta di personal. “Mas o menos 70 a bay for di prizon, pa un of otro motibo. Ningun hende no a reemplasa nan”, Bremer ta remarca.

Pero minister Girigorie no tin mesun opinion cu sindicato ABVO tocante e grado di falta di siguridad na nos prizon. “Tur prizon na mundo ta luga peligroso pa traha.”

Minister Girigorie ta splica tambe e formamento di gueni den comunidad tin su refleho den prizon. Ta p’esey ta necesario pa separa hendenan cu ta den gueni for di otro, pa nan propio siguridad y pa evita incidente regular entre gueni den SDKK.

“Den SDKK tambe e gueninan cu ta funciona den comunidad ta manifesta, pasobra nan miembronan ta ki cera. Ta p’esey ta tene cuenta cu esaki pa evita incidente”, e ta bisa.

Violencia diferente

Tocante e violencia cu detenido Venezolano ta aplica, minister Girigorie ta menciona cu a keda demostra cu e Venezolanonan den e incidente di e siman aki no a usa un violencia comun cu ta topa den prizon of cerca detenido di Corsou of cualke otro nacionalidad.

A trata di un atake organisa y coordina den grupo contra di mas detenido. “Ta relativamente usual cu tin cierto cosnan di violencia den institutonan penitensiario. Pero esaki tabata un excepcion debi na e forma cu a organis’e y coordin’e.”

Cu hopi enfasis e minister ta menciona cu no por atribui e incidente di e siman aki na falta di personal. “E hendenan a stroba e personal pa drenta den e blok caminda cu e incidente a tuma luga. E personal mester a drenta e blok via un otro porta. Ta incorecto pa relaciona e incidente cu falta di personal.”